Мэнни Пакьяо нокаут қилган боксчи фаолиятини якунлади

Аргентиналик боксчи Лукас Матиссе профессионал рингдаги фаолиятини якунлаганини маълум қилди.

Бу боксчи сўнгги марта июл ойида Куала-Лумпур (Малайзия) шаҳрида саккиз вазн тоифасининг собиқ жаҳон чемпиони филиппинлик Мэнни Пакьяога қарши рингга чиқиб, саккизинчи раундда техник нокаутга учраган эди.

– Бокс ҳаётимни ўзгартирди. 10 йил юқори даражада рингда жанг қилганимдан фахрланаман. Бу вақтда мен жаҳоннинг энг яхши боксчилари билан учрашдим. Мақсадларимга эришдим ва ҳаётдаги орзуларим амалга ошди. Бу йўлда мени қўллаб-қувватлаган барчадан миннатдорман, айниқса оиламдан. Бугун мен қўлқопларимни михга илишга қарор қилдим. 2018 йил августдан спортдаги фаолиятимни якунлайман, – деб ёзади Матиссе ўзининг Инстаграм саҳифасида.

Эслатиб ўтамиз, Матиссе профессионал боксда 45 та жанг ўтказиб, 39 ғалаба (шулардан 36 таси нокаут), 5 мағлубият ва 1 дуранг қайд этган.