Ўзбек футболидаги ўзгаришлар, БААни йиғлатган Қатар ва бошқалар (Видео)

Хабарингиз бор, сайтимиз томонидан “Ҳафта воқеликлари” дея номланган лойиҳани тақдим этиб келмоқдамиз. Сиз унда ўзбек, Осиё ва жаҳон футболида содир бўлган ҳафтанинг энг муҳим воқеликлари билан танишишингиз мумкин.

Дастлаб ўзбек футболи ҳақида.

 

Осиё Кубоги-2019да Эрон бош соврин учун асосий фаворит сифатида кўрилаётганди. Аммо форслар яна финалсиз қолишди. Япония Карлуш Кейруш шогирдларини таслим этди.

Қатар эса сенсация кўрсатишда давом этади. Улар мезбонларни ярим финалда қолдириб кетишди. БАА ўз уйидаги мусобақада кутилган натижани кўрсата олмади.

Бирлашган Араб Амирликларида ўтаётган навбатдаги Осиё Кубоги ҳам якунланиш арафасида. БАА мезбонлик қилган қитъа биринчилигида фақатгина битта ўйин қолди. У ҳам бўлса финал. Ҳал қилувчи беллашувда Япония ва Қатар қарама-қаршилиги кузатилади.

Биз эса ярим финал ўйинларининг қисқача шарҳига тўхталиб ўтамиз.

Осиё Кубоги-2019

Ярим финаллар

ЭРОН - ЯПОНИЯ 0:3

Голлар: Осако 56, пенальти 67, Харагути 90+1

Ярим финалнинг дастлабки учрашуви кўпчиликни ажаблантирди. Эрон ярим финалга бирорта ҳам гол ўтказиб юбормай етиб келганди. Рақиблари дарвозасини ишғол қилишда уларга тенг келадигани тўпилмаётганди. Натижада, форслар чемпионат фаворитига айланишганди.

Япония аранг ғалаба қозониб, рақибларини битта тўп фарқи билан таслим этаверди. Бу эса улар тўғрисида бироз бошқачароқ ҳулосага келишимизга ундади. Аммо бу японларнинг алдамчи тактикаси экан. Хажима Мориясу шогирдлари хоҳлаган пайт исталган жамоани доғда қолдиришларини намойиш этишди. “Самурайлар” эронликлар дарвозасини иккинчи таймда уч бош ишғол қилишди ва финалга йўл олишди. Мағлубиятдан сўнг Эрон терма жамоаси устози Карлуш Кейруш истеъфога чиқишини маълум қилди. Хабарларга қараганда, португалиялик мутахассис Колумбия терма жамоасида иш бошлайди.

Умуман олганда, Эроннинг финалдан қучуқ қолиши кутилмаган ҳолат эмасдек. Бу терма мунтазам тарзда жаҳон чемпионатида ўйнайб келса-да, қитъа биринчилигида охирги марта 1976 йили ғолибликка эришган. Бу галги уриниш ҳам самарасиз якунланди.

 

ҚАТАР - БАА 4:0

Голлар: Хухи 22, Али 37, Ал Ҳайдос 80, Ҳамид 90+4

Бир неча кун олдин Қатар ўз тарихида илк бор ярим финалга чиққанини, бу борада улар Жанубий Кореяни ортда қолдиришганини маълум қилгандик. Энди эса Феликс Санчес финалга чиқишди.

Жаҳон чемпионати-2022 мезбони Осиё Кубоги-2019ни ўзида қабул қилган Бирлашган Араб Амирликлари дарвоазсига жавобсиз 4 та тўп киритган ҳолда финалчига айланишди. Беллашувда иккинчи голни урган Алмоез Али ажойиб натижа қайт этди.

Қатар термаси сафида Алмоез Али гуруҳ босқичининг ўзидаёқ 7 та гол уришга муваффақ бўлган эди. "Ал Дуҳайл" клубининг 22 ёшли ҳужумчиси ярим финалда БАА дарвозасига битта гол урди ва Осиё Кубоклари тарихидаги энг яхши тўпурар Али Дайига етиб олди. Дайининг ҳисобида 8 та гол мавжуд. Эронлик собиқ тўпурар 1996 йилги Осиё Кубогида 8 бор рақиблар дарвозасини ишғол қилган.

Энди 22 ёшли футболчи финалда ҳам дарвозага тўп киритса, рекорд ўрнатади.

Шунингдек, Қатар Осиё Кубоги-2019да ўз дарвозаси дахлсизлигини сақлаб келмоқда. Қатар Осиё Кубоклари тарихида дастлабки 6 та ўйинда гол ўтказиб юбормаган илк жамоа. Улар 16 бор гол уришди.

Шу ўринда битта гап. 2018 йил 19 январь куни 23 ёшликлар ўртасидаги Осиё чемпионати чорак финалида Ўзбекистонга 0:4 ҳисобида енгилган Япония терма жамоаси футболчилари мухлисларидан узр сўраб, бошларини эгишганди. Бир йил ўтиб бу жамоанинг бош мураббийи Хажиме Мориясу Японияни Осиё Кубоги финалига олиб чиқди. Ўзбекистонни ўша мусобақада чемпион қилган мураббий Равшан Ҳайдаров эса ёшлар терма жамоасида ёрдамчи мураббий бўлиб ишламоқда. Ўсиш ва пасайиш.

Финал 1 февраль куни Бирлашган Араб Амирликлари пойтахти Абу-Даби шаҳридаги “Шайх Зайид” стадионида бўлиб ўтади. Эътиборлиси, мусобақанинг ҳал қилувчи баҳси Равшан Эрматов бошчилигидаги ўзбекистонлик ҳакамлар бригадасига ишониб топширилди. Эслатиб ўтамиз, 41 ёшли ҳакамимиз учун бу қитъа кубогидаги биринчи финал эмас. У 2011 йил Қатарда бўлиб ўтган Осиё кубоги финалида ҳам ишлаган эди. Ўшанда ҳам Япония финалда Австралия билан куч синашган. Ўйиннинг асосий бўлимлари дуранг билан якунлангач Эрматов қўшимча таймларга мурожаат қилган эди. 108-дақиқаси ўтиб бораётган бир пайтда япониялик Юто Нагатомо австралияликлар дарвозасини ишғол этиб жамоасига ғолибликни тақдим этганди.

1 февраль куни Тошкент вақти билан соат 19:00да бошланадиган финалда Токио-2020га тайёргарлик кўраётган япониялик ёшлар ва ЖЧ-2022га ҳозирланаётган ёш қатарликлар беллашади.

Финал. 1 февраль

Япония – Қатар 1:3

Голлар: Минамино (69) - Алмуъиз (12), Ҳатим (27), Афиф (83 пен)

Ўйин тенг курашлар остида ўтган бўлса-да, қатарликлар ўз имкониятларидан унумлироқ фойдаланиб қолишди ва 3:1 ҳисобида ғалаба қозонишди.

12-дақиқада мусобақа тўпурари Али Алмоез қайчи услубида зарба йўллаб, Япония дарвозасига тўп киритди. Ҳужумчи ярим финалда БАА дарвозасига битта гол урди ва Осиё Кубоклари тарихидаги энг яхши тўпурар Али Дайига етиб олганди. Энди японларга гол урган Али мутлақ рекордчисига айланди. Яъни у битта Осиё Кубогида энг кўп гол урган футболчи бўлди.

Орадан 15 дақиқа ўтгач, Ҳатим узоқ масофадан йўлланган зарба натижасида чиройли гол уриб, ҳисобдаги фарқни оширди. 69-дақиқада Минамино дарвозабон билан юзма-юз чиқиб, яқин масофадан тўпни унинг устидан ошириб қўйди. 83-дақиқада Афиф пенальтини аниқ амалга ошириб, якуний ҳисобнинг 3:1 бўлишини таъминлади.

Натижада, Қатар терма жамоаси ўз тарихида илк маротаба Осиё чемпионлигини қўлга киритди. Шунингдек, қитъа биринчилиги учун тайёрланган янги кубокнинг дастлабки соҳибига ҳам айланди.

Қайд қилиш жоизки, баҳсни ҳамюртимиз Равшан Эрматов бошчилигидаги ҳакамлар гуруҳи бошқариб боришди. 41 ёшли ҳакамимиз учун бу қитъа кубогидаги биринчи финал эмас. У 2011 йил Қатарда бўлиб ўтган Осиё Кубоги финалида ҳам ишлаган. Ўшанда ҳам Япония финалда иштирок этганди. Ўшанда Австралия билан куч синашган “кўк самурайлар” 108-дақиқада Юто Нагатомонинг голи эвазига чемпионга айланишганди. Бу галги финалда эса улар имкониятни бой беришди.

Финал ўйинидан сўнг мусобақанинг энг яхшилари тақдирланди. Жумладан, Қатар терма жамоаси посбони Саад Ал Шееб энг яхши дарвозабон деб топилди. Ал Шееб ОК-2019 давомидаги 7 ўйинда ўз дарвозасидан бор йўғи 1 та гол ўтказиб юборди. У ҳам бўлса финалда. Унга соврин билан бирга 10 минг АҚШ доллари миқдорида пул мукофоти берилди.

Қатар терма жамоаси ҳужумчиси Али Алмоез 9 та гол билан мусобақа тўпурари бўлди. Бундан ташқари, финалда шедевр гол муаллифига айланган ушбу ҳужумчи Осиё Кубоги-2019нинг энг яхши ўйинчиси деб топилди.

Алмоезга соврин билан бирга 30 минг АҚШ доллари миқдорида пул мукофоти тақдим этилди.

"Ал Садд" клуби аъзоси Хави Эрнандес Осиё Кубоги олдидан ўз тахминларини билдирган эди.

Испаниялик футболчининг 1 январь куни айтган башорати қуйидагича эди:

Ўзбекистон терма жамоаси ўз гуруҳида 2-ўринни эгаллайди. Австралия ҳам ўз гуруҳида Суриядан кейин 2-поғонани банд этади ва улар 1/8 финалда тўқнаш келади. Бу баҳсда Австралия ғалаба қозонади.

Унинг тахминига кўра финалга Япония ва Қатар етиб боради. Ҳал қилувчи учрашувда Қатар ғолиб бўлади. Қатар терма жамоаси бош мураббийи Феликс Санчес ҳам айнан ҳамюртининг башорати ҳақидаги саволга ҳазил тариқасида жавоб қайтарди.

- Мен кейинги ўйинларимиз ҳақида ҳам Хавига қўнғироқ қиламан, - деди испаниялик мутахассис.

Интилган, ўз олдига қўйган мақсади сари астойдил ҳаракат қилганлар муродларига етишини Қатар мисоли кўрдик. Турнирдан олдин ҳеч ким Қатарни фаворит ҳисобламаганди, тўғрими? Хатто Хави Қатар чемпион бўлишини айтганда ҳам унинг ўша давлатда фаолият юритаётгани учун шундай деб қўйди-да, дедик. У бир неча йилдан бери Осиёда тўп тепаётгани ва рақибларнинг кучини тўғри чамалаганини кўрдик. Демак, бизга ҳам Хави каби мутахассис керакдир... Энди бор умидимиз жаноб Купердан. Эктор Купер бизни мундиал сари етакласа бўлгани. Ана шундай гаплар.

 

Ўзбекистон олимпия терма жамоасини сербиялик мураббий бошқаради. Ушбу жамоани чемпион қилган Равшан Ҳайдаров унга кўмаклашади.

Сербиялик мутахассис Любинко Друлович Ўзбекистон олимпия терма жамоасига бош мураббий этиб тайинланди.

Мутахассис билан шартнома имзолаш маросими 23 январь куни Миллий олимпия қўмитасида бўлиб ўтди. Друлович билан 1 йилга мўлжалланган шартнома имзоланди. Агар олимпиячиларимиз Токио-2020 йўлланмасини қўлга киритишса, шартнома муддати Олимпиада якунига қадар узайтирилади.

- Ўзбекистон олимпия терма жамоаси олдига Токио-2020 йўлланмасини қўлга киритиш вазифаси қўйилган. Умид қиламизки, сиз бошчилигингизда тарихий натижа қайд этиб, йўлланма қўлга киритилади. Мақсадимиз, шунчаки Олимпиада эмас, балки ушбу мусобақада муносиб иштирок этиш ҳисобланади. Бунинг учун барча шароитлар яратиб берилади. Иш бошлашдан аввал миллий терма жамоамиз бош мураббийи Эктор Купер билан учрашиб, фикр ва тажриба алмашиб олишингиз ҳам мумкин. Шунингдек, Суперлигада қатнашаётган клублар мураббийлари ҳам сиз билан яқин ҳамкорликда иш олиб боришади, - деди ЎФА биринчи вице-президенти Умид Аҳмаджонов.

- Авваламбор, менга билдирилаётган ишонч учун ўзим ва ёрдамчиларим номидан раҳмат айтаман. Биргаликда ҳаракат қилиб, Токио-2020 Олимпиадасига бора оламиз. Умид қиламанки, ҳамкорлигимиз самарали бўлади, - деб айтган Друлович.

Друловичга маҳаллий мутахассис - Равшан Ҳайдаров ёрдамчилик қилади (Ўзбекистон олимпиячилари Ҳайдаров билан 2018 йил январида 23 ёшлилар ўртасида Осиё чемпиони бўлганди).

Любинко Друлович 2013 йили 19 ёшгача бўлган ёшлар ўртасидаги Европа чемпионатида Сербия терма жамоаси билан ғолибликни қўлга киритган (финалда Франция 1:0 ҳисобида мағлуб этилган). Ўша йили Сербияда йил мураббийи деб тан олинган. Бундан ташқари, Любинко Друлович Сербия ва Македония терма жамоалари бош мураббийи сифатида ишлаган, БАА ёшлар (U-19) терма жамоаси билан 2018 йилги Осиё чемпионати финалига чиққан, бироқ гуруҳ босқичидаги Индонезияга қарши ўйиндаги кутилмаган мағлубият сабаб, мусобақа билан хайрлашган.

Друлович футболчилик фаолиятининг асосий қисмини Португалия клубларида ўтказган. Хусусан, 1993-2001 йилларда «Порту» клубида 225 ўйинда майдонга тушиб, 40 та гол урган, 2001-2003 йилларда эса «Бенфика» сафида 50 та баҳсда 5 марта рақиблар дарвозасини ишғол қилган.

 

Нестеров Саудия Арабистонига кетди. У “Уҳуд” клуби сафини тўлдирди. “Локомотив” Рашидов, Алибоев, Шоаҳмедов ортидан миллий терма жамоамизнинг асосий дарвозабони Игнатий Нестеровни ҳам хорижга кузатиб қўйди.

2014 йилдан буён "Локомотив" шарафини ҳимоя қилаётган Игнатий Нестеров эндиликда Саудия Арабистонининг "Уҳуд" клуби дарвозасини қўриқлайди.

4 йиллик фаолияти давомида Игнатий “Локо” таркибида 160 ўйинда (14433 дақиқа) қатнашди. Шу орқали у жамоанинг мамлакат чемпионлигини кетма-кет уч марта қўлга киритишига катта ҳисса қўшди.

Шунингдек, Нестеров жами бешта Осиё Кубогида қатнашди ва бу борада турнир рекордчисига айланди. БААда давом этаётган мусобақада бир неча бор рамзий терма сафидан ўрин олди.

Шу тариқа, “Локомотив” якунланган мавсумдан сўнг хорижга Рашидов, Алибоев, Шоаҳмедов ортидан миллий терма жамоамизнинг асосий дарвозабони Игнатий Нестеровни ҳам кузатиб қўйди.  

Игнатий Нестеровнинг статистикасига этибор берсак.

2001 "Динамо" 24 ўйин

2002-2009 "Пахтакор" 192 ўйин

2010-2013 "Бунёдкор" 137 ўйин

2014-2018 "Локомотив" 160 ўйин

2002-2019 Ўзбекистон миллий терма жамоаси 106 ўйин.

Нестеровга Саудия Арабистонидаги фаолиятида омад тилаб қоламиз.

 

Роберто Карлос Тошкентга келди. У ёшларга мастер-класс ўтади, меҳрибонлик уйига борди ва матбуот анжуманида иштирок этди

Жаҳон футбол юлдузи Роберто Карлос 28 январь куни Тошкентга келди. Бу ҳақда ЎФА матбуот хизмати хабар берди.

Роберто Карлос турли тадбирларда иштирок этди. Жумладан, ёш футболчилар учун ЎФА майдонида мастер-класс ташкил этилди. Кейин шу ернинг ўзида фахрий футболчилар иштирокида ўртоқлик ўйини бўлиб ўтди. Учрашув 10 дақиқадан икки тайм давом этди. Роберто Карлос ҳар иккала жамоа таркибида биттадан таймда тўп тепди.

Роберто Карлос А.П.Хлебушкина номидаги Меҳрибонлик уйига ташриф буюриб, у ердаги тарбияланувчилар билан учрашди ва болаларга совғалар тақдим этди. Шунингдек, Роберто Карлос билан матбуот анжумани ташкил этилди.

Жаҳон футболи юлдузларининг юртимизга ташрифи мамлакатимизда футболни оммалашатиришга ҳисса қўшади ва болаларда ушбу спорт турига қизиқишни оширишга хизмат қилади.