Премьер Лиганинг энг яхши ёш футболчиси бўлишга ким ҳақли?

Европа футболи ўзининг энг қизғин ва сўнгги палласига кирган. Аммо Премьер Лигада чемпионлик “Манчестер Сити”га насиб бўладиган бўлди. Демак ҳозирдан бир неча совринларни айнан “шаҳарликлар” ўзлариники қилиб олишлари аниқ. Шу жумладан, Премьер Лиганинг энг яхши ёш футболчиси мақоми ҳам Гвардиола шогирдларидан бирига берилса, ҳайратда қолмаймиз. Питер Бернс ушбу совринни ютган “Манчестер Сити”нинг сўнгги вакили ҳисобланади. Ушбу мавсум якунида қайси футболчи уни ўзиники қилиб олишга ҳақли: Раҳим Стерлинг ёки Лерой Сане? The Guardıan бу ҳақида мулоҳаза юритди.
Премьер Лигада “мавсумнинг энг яхши футболчиси” соврини учун овоз бериш ўтказилди ва унда баҳс Кевин де Брюйне ва Муҳаммад Салаҳ ўртасида кечадиган бўлди. Худди шундай ўхшаш вазият “Йилнинг энг яхши ёш футболчиси” категориясида ҳам кечадиган бўлди. Унда “Манчестер Сити”нинг нақ икки футболчилари соврин учун кураш олиб боришади. Стерлинг ва Сане 23 ёшгача бўлганлар ўртасида тенгсиз деб топилишга лойиқ дея баҳоланмоқда.
Стерлинг ва Сане номзодлар орасида дарҳақиқат мавсум давомидаги мусобақаларда ўзларини энг яхши томонларини кўрсата олишди. Умуман олганда, 21 ёшгача бўлганлардан фақатгина 20 ўйинчи мавсумда камида 10 ўйин ўтказган ва уларнинг кўпчилиги ўз клуби асосий таркибига қўшила олган. Улар орасида Девинчон Санчес, Ричарлисон ва Микел Мериноларни алоҳида тилга олишимиз керак. Трент Александр-Арнольд ҳам бу совринни ютишга муносиб номзод бўла олади. Аммо 19 ёшли ҳимоячи сўнгги йилларда ўзларини анча яхши кўрсата олган номдор футболчилар – Деле Алли, Маркус Рэшфорд ёки Стерлинглар орасида йўқолиб қолади.
Стерлингни Премьер Лиганинг ветеранларидан бири сифатида ҳам кўрсатишимиз мумкин. У ўзининг миллий биринчиликдаги олтинчи мавсумини ўтказмоқда. У 24-декабрдагина 24 киради ва айни вақтда у бемалол ушбу совринга номзодлик қилиш ҳуқуқига эга.
Бу йил Раҳим Стерлинг ўзининг энг сермаҳсул мавсумини ўтказмоқда. Унинг ўйинида бирорта жиддий кучсизлик жиҳатини кузатмадик. Албатта, “Манчестер дерби”сида ҳавога совурган баъзи хавфли вазиятларни эътиборга олмасак. Унинг рақиб майдончасида тўпурарлик маҳоратини қойилмақом ишга солиши жамоасига жуда катта фойда келтирмоқда. Унинг керакли пайтда керакли жойда бўла олиш иқтидори унга 16 гол уришга ёрдам берди. Ундан фақатгина Салоҳ (29 гол), Харри Кейн (24 гол) ва Серхио Агуэро (21 гол) олдинда бормоқда.
У голларининг чорак қисмини “Йилнинг энг яхши ёш футболчиси” соврини учун асосий рақибига айланган ва жамоадоши Лерой Саненинг узатмалари натижасида урган. Икки қанотдаги футболчиларнинг ўзаро ҳамкорлиги ва муваффақиятли ўйнай олиши Гвардиоланинг ғалаба формуласига айланди. Сане жамоанинг энг муҳим футболчисига айланди. У тез-тез рақиб жарима майдончасидаги тажовузкорлиги ва клубдошларини тўп билан таъминлашдаги жонбозликлари билан катта хажмдаги ишни бажарди.
Унинг “Манчестер дерби”сида Венсан Компанига голли узатмаси мавсумдаги ўн иккинчиси бўлди. Ундан олдин фақатгина Де Брюйне (15) олдинда бормоқда. Сане Стерлинг каби хавфли вазиятларга кириб бормаган. Стерлинг бундай вазиятлардан 73 тасига эга бўлган бўлса, Сане 49 бора яккама-якка вазиятга чиққан. Бу эса ушбу жуфтлик бир хил қобилиятга эга бўлсада, майдоннинг ушбу қисмида турли вазифаларга эгалигини билдиради.
Сане чап қанотда кенгроқ ўйнаётган бир пайтда, Стерлингга рақиб ҳимоячилари Агуэро ва Жезус билан банд бўлган бир пайтда, марказий позицияга кириб бориш ҳуқуқи берилган.
Бизнинг рейтингимизга кўра, Стерлинг (7.55) Санедан (7.53) бироз олдинда. Кучли бешликка Эмре Жан (7.28), амалдаги соврин эгаси Деле Алли (7.15) ва Уилфрид Ндиди (7.13) кирган. Нима бўлганда ҳам бу йилги соврин эгаси сўзсиз “Манчестер Сити” вакили олиши аниқ. Бундай совринни ушбу клубдан сўнгги марта узоқ ўтмишда, 1976-йилда Питер Бернс ютиб олган эди.

Эркин Ғайбуллаев тайёрлади