Шомуродов учун курашга Италиядан янги жамоа қўшилди

24 июнь, 08:55
Zohir Toshxo’jayev
0
Футбол

Ўзбекистон миллий терма жамоаси сардори ва энг зўр тўпурари Элдор Шомуродовнинг бозорини қайнай бошлади. “Рома”да бош мураббий алмашганидан кейин таркиб ҳам жидди ўзгаришларга юз тутиши кутиляпти.

29 ёшли легионеримизнинг римликлар билан яна икки йиллик шартномаси бор. Бироқ янги бош мураббий Жан Пьеро Гасперини ҳужум чизиғига ўзи истаган бошқа ўйинчиларни олиб келишга ҳаракат қилаётгани ҳамюртимизнинг пойтахтдаги келажагини шубҳа остига қўймоқда.

Якунланган мавсумнинг иккинчи қисмини юқори даражада ўтказган футболчимизни ўз сафида кўришни истаётган клублар сони тобора ошиб бормоқда. Шомуродовга биринчи таклифни юборган АҚШ жамоалари ҳужумчи учун курашдан чиққан бўлса, охирги кунларда Туркиянинг “Башакшеҳир” ва Франциянинг “Ренн” каби клублари Элдорни олиш учун “Рома” раҳбариятига ўз таклифларини юборган ва музокараларни давом эттираётгани маълум қилинмоқда.

Энди Италиядаги нуфузли манбалар ўзбек форвардига янги харидор чиққани, А Серия клублари меҳнаткаш ўйинчини бошқа лигага кетиб қолишига йўл қўймаслиги ҳақида ёза бошлади.

- “Рома” ҳар бир йўналишда катта ўзгаришлар қиляпти ва шу қатори трансфер бозорида ҳам фаоллик кўрсатади. Клубнинг мақсади аниқ: 30 июнга қадар ғазнага кирим қилиш керак. Бунинг сабаби нима?

Бир неча йил олдин “Рома” молиявий фэйр-плейни бузгани учун УЕФА клубга ҳар йили июнь ойида баланс белгиланган чегаралардан ўтмагани ҳақидаги ҳисоботни топшириб бориш мажбуриятини юклаган. Бу гал римликлар 30 июнга қадар камида 10 миллион евро тушун қилиши керак. Бунинг энг қулай йўли ўйинчиларни сотиб юбориш.

Трансфер бозорида энг харидоргир активлардан бири шубҳасиз Элдор Шомуродов. Ўзбек ҳужумчиси ўтган мавсум юқори савияда ўйнади ва муҳим голлар, ассистлар муаллифи бўлди. Марказий ҳужумчи ҳар доим курашга тайёрлиги билан мухлислар эътибори ва эҳтиромини қозонди. “Башакшехҳир” ва “Ренн” ўртасида талаш бўлаётган ҳужумчи учун курашга А Серия вакиллари ҳам қўшила бошлади, - деб ёзмоқда romaforever.it сайти эксперти Фрэнсис Дандольфо.

Бу маълумотларни бошқа нуфузли манбалар ҳам тасдиқлаб, масалага янада аниқлик киритди.

- Ҳамманинг диққат марказида Шомуродов. “Рома” ўтган мавсумнинг иккинчи ярмида муҳим голлари ва ассистлари билан асосий қаҳрамонга айланган ҳужумчи билан хайрлашишга тайёр.

Sportitalia нашрининг трансфер бозори бўйича эксперти Жанлуижи Лонгарининг маълум қилишича, “Кремонезе” ўзбек форварди учун курашга қўшилди.

Шомуродов ўтган мавсумда барча турнирларда 37 та учрашувда иштирок этиб, еттита гол ва бешта ассист қайд этган эди, - деб ёзмоқда vocegiallorossa.it сайти.

Таъкидлаш жоизки, “Кремонезе” ўтган мавсум якунларига кўра, қуйи лигадан А Серияга кўтарилди. Энди бу жамоа бош мураббийи Жованни Строппа таркибни юқори дивизион клублари билан рақобатлашадиган даражага олиб чиқиши керак.

Охирги кунларда “Рома” раҳбарияти Элдор Шомуродовнинг трансферидан 10 миллион евро ишлаб олишни мўлжаллаётгани ҳақида ахборотлар тарқатилган эди. Аксарият манбалар клуб вазиятдан келиб чиқиб, бу талабини бироз пасайтириши мумкинлигини таъкидлаяпти.