"Шўртан" мураббийи: "Ҳар сафар матбуот анжуманида бу ҳақида гапиряпмиз..."

Суперлиганинг 13-турида “Шўртан” клуби “Сурхон”га қарши баҳс олиб борди.

Қизиқарли кечган учрашувда “Шўртан” иродали тарзда 2:1 ҳисобида ғалаба қозонди. Натижада чемпионатдаги иккинчи ғалабасига эришди.

Беллашувдан кейин “Шўртан”нинг вақтинчалик бош мураббийи Элдор Мойлиев матбуот анжуманида қатнашди.

- Бу ўйинга пухта тайёргарлик кўргандик. Кутилмаганда хатоимиз билан тезкор гол ўтказиб юбордик. Бироқ йигитларга раҳмат айтаман, иродасини, хоҳишини кўрсатиб, чиройли суръатда ғалаба қозонишди. Ғалабани Ғузор аҳлига бағишлаймиз. Мухлисларимизга қўллаб-қувватлаб туришгани учун катта раҳмат.

- Ўйинда тезкор гол ўтказиб юборилди. Шундай вазиятларга қарши алоҳида тайёргарлигингиз бормиди?

- Футболчилар билан келишиб олгандик. Учрашувда ҳар хил вазиятлар бўлади. Лекин ҳеч қачон қўлни туширмасдан охиригача курашишга келишганмиз. Яна бир бор айтаман: ўйинчиларимизга катта раҳмат, бу нарса қўлидан келди, уддалашди.

- Иккинчи тайм бошида ҳимоя чизиғида ўзгаришлар қилдингиз. Биринчи таймда кўпроқ хатолар кўрдингизми ёки тактик ўзгаришмиди?

- Жароҳати бор эди. Жўрабек Маннонов бизда тезкор футболчи эди, ҳужумларга яхши қўшилади. Улар 10 киши бўлиб қолганидан кейин тезкор ҳужумга қўшиладиган ҳимоячиларни майдонга туширдик.

- Ҳасанов борасида нима дея оласиз?

- Жавоҳир тезкор футболчи. Ҳаммага имконият беряпмиз. Ўтган сафар 20 таликка кирмаганларни бу сафар 20 таликка қўйдик. Унга ҳам имконият берамиз. Лекин ҳозирги вазиятдан келиб чиқиб Аброр Тошқўзиевни синаб кўрмоқчи бўлдик. Кўрдинглар, у гол урди. Танловда адамашдик, деб ўйлайман. Жавоҳирга ҳам имконият берамиз.

- Одатда “Шўртан” ҳужумларда кўпроқ гол урмади. Бу сафар вазиятлар кўпроқ бўлди. Балки ҳужумчи олиш керакми?!

- Ҳар сафар матбуот анжуманида бу ҳақида гапиряпмиз. Ҳужумда 2006 йилда туғилган бола ўйнаяпти. Айтиб ўтганимиздек, бизга тажрибали ҳужумчи керак. Нафақат ҳужумда, балки икки қанотда ҳам рақобат учун ҳужумкор ярим ҳимоячилар зарур. Бу ўйинчиларимиз ҳам яхши, лекин уларга рақобат учун футболчилар керак.