Про-лигада плей-офф жуфтликлари маълум бўлди

Хабарингиз бор бугун Про-лиганинг сўнгги 36-тур учрашувлари ўз ниҳоясига етди. Якуний натижаларга кўра “А” гуруҳида “Андижон” чемпионликни қўлга киритган бўлса, иккинчи ўрин “Машъал”га, учинчи ўрин эса “Истиқлол”га насиб этди. “Б” гуруҳида эса “Нурафшон” чемпионликка эришди. Плей-оффга йўлланма берувчи иккинчи ўринни эса “Шердор” клуби қўлга киритди.

Мусобақа регламентига кўра “А” гуруҳида 2-ўринни эгаллаган жамоа “Б” гуруҳида иккинчи ўринни эгаллаган жамоага қарши плей-оффда ўйнайди. “Б” гуруҳи чемпиони эса “А” гуруҳида учинчи ўрин эгасига айланган клубга қарши баҳс юритади. Бу ўйинларнинг барчаси Тошкентдаги ТТМИ майдонида бўлиб ўтади.

Ушбу жуфтликлар ғолиби эса мос равишда Суперлига йўлланмасини қўлга киритиш учун Суперлигада 10- ва 11- ўринни эгаллаган жамоаларга қарши майдонга тушишади.