Рўзиқул Бердиев: Менинг истеъфоим орқали муаммолар ечилса, эртагаёқ кетаман

“Насаф” клубининг муаммолар гирдобида қолганидан хабарингиз бор. Шу сабабли ҳам қаршиликлар биринчи босқичдан кейин кучли олтиликка кира олишмади. Жамоа бош мураббийи Рўзиқул Бердиев эса бир қатор етакчиларнинг кетганига қарамай, вазиятни ўнглашга ҳаракат қиляпти. Аслида уни яхши савияли мутахассис эканлигига шубҳа йўқ. Бунга эришган натижалари орқали ҳам амин бўлиш мумкин. 2011 йили ОФК Кубоги қўлга киритилганида у ёрдамчи мураббий сифатида ишлаган. Бош мураббий сифатида эса чемпионатимизда 4 та бронза ва 1 та кумуш медал қўлга киритилди. Шунингдек, яна бир мартадан Ўзбекистон Кубоги ва Суперкубогида ҳам зафар қучди. 4 марта эса Ўзбекистон Кубоги финалчиси бўлди. 3 марта Ўзбекистоннинг энг яхши мураббийи бўлган Бердиев 5 марта Осиё Чемпионлар лигасида “Насаф” бош мураббийи сифатида иштирок этди. Шу билан бирга у ўтган йили Ўзбекистон Республикасида хизмат кўрсатган спорт устози, унвони билан тақдирланган. Хуллас, барча мухлисларнинг меҳрини қозона олган мутахассис эндиликда ўз жамоаси билан ўта мушкул аҳволга тушиб қолган. Биз эса Рўзиқул Саъдуллаевич билан мавжуд муаммолар ва бошқа масалалар бўйича атрофлича суҳбатлашдик.

“Энди асосий мақсад “Насаф”ни Суперлигада сақлаб қолиш”

- Бу йилги мавсум ҳар йилгидан кўра бошқачароқ ўтяпти. Чунки бунга формат ўзгаргани ҳам сабаб бўляпти, - деб гап бошлади Бердиев. - Чемпионлик учун курашиш йўлида юқори олтиликдан жой олган жамоалар ҳақли равишда бошқалардан кучлироқ эканликларини кўрсатишди. Шунга яраша уларнинг натижалари ҳам яхшироқ бўлди. Ҳар холда юқори олтиликдан жой олган клубларда барқарор ўйин кўзга ташланиб турди. Менимча, иккинчи босқичда 1-ўрин учун кураш ва Суперлигадан тушиб кетмаслик учун ҳам кураш янада қизиқроқ бўлади. Негаки, эндиликда жамоалар иккига ажралгани боисдан уларнинг кучлари деярли тенглашиб қолди. Мухлисларимизни олдинда иккала гуруҳда ҳам қизиқарли ўйинлар кутиб турибди деб ўйлайман.

- “Насаф”нинг бунга қадар ҳар йили совринли ўринлар учун курашишига ва қандайдир муваффақиятга эришишга гувоҳ бўлардик. Бу сафар эса жамоангиз кучли олтиликдан четда қолгани аслида ажабланарли. Энди иккинчи босқич учун курашларда жамоангиздаги иштиёк ва шижоат камайиб кетмасмикин?

- Мақсадимиз дастлабки олтиликка кириш эди. Афсуски, бунга эриша олмадик. Ўзларинг ҳам биласизлар, бунинг бир қанча сабаблари бор. Хабарингиз бўлса, бундай ҳолатга тушишимиз мумкинлигини бундан икки ойча олдин гапиргандим. Агар етакчиларимиз жамоамизни тарк этадиган бўлса, бизга жуда қийин бўлади, деган гапимни анча аввал айтганман. Шуларни билган ҳолда баъзи-бир футболчиларни жамоамизга таклиф қилиш ва айрим етакчиларимизни сақлаб қолиш ҳақида ўйладик, аммо бу ҳам амалга ошмади. Шу боис биз жуда қийин аҳволда қолдик. Бу ҳам етмаганидек, “Навбаҳор”га қарши учрашувда Азиз Ғаниевнинг жароҳат олиб сафдан чиқиши жамоамиз учун катта йўқотишга айланди. Албатта, у ёки бу ўйинчиларимиз жароҳат олди, айрим ўйинчиларимиз кетишди, деб ишлашдан тўхтаб қолганимиз йўқ. Бундай сабаблар туфайли ётиб олиб, дод-вой ҳам қилаётганимиз йўқ. Ҳозирги таркибимиз билан ҳам олтиликка киришга ҳаракат қилдик. Фақат имкониятимиз борича курашдик. Тўғри, айрим учрашувларда паст ҳаракат қилдик, бироқ баъзи беллашувларда ёшларимиз билан ҳам яхши ўйнадик. Барибир ёшлар билан барқарор ўйнаш қийин деб бежизга айтишмайди. Йигитларимизни ўйинларга бўлган иштиёқи камаймаслиги учун улар билан руҳий томондан ишлашга ҳам ҳаракат қилдик. Биламиз, ёш футболчиларимизнинг маҳорати пастроқ. Аммо иштиёқ ва ўйинларни ташкил қилиш борасида биз очколарни йиғишимиз керак эди. Тўғри, ҳозир қийин аҳволдамиз, бундай бўлишини ҳеч ким кутмаганди. Аммо бу ҳолатимизда ёшларимиз ўзлари учун тажриба ҳам тўплаб боришяпти ва бу кейинчалик уларга асқотишига ишонаман. Балки бу йилги натижа биз учун унчалик муҳим бўлмасдир, бироқ шундай даврда ёшларимиз билан қўрқмасдан ўйнаётганимиз келажакда ўз мевасини беришига умид қиламан. Ҳа, мухлисларимизни ҳам тушуниб турибмиз. Хоҳлайсизми-йўқми, барибир футболда биринчи ўринда натижа туради. Аммо ҳозирги қийин вазиятга тушиб қолганимизни улар ҳам тушуниб туришибди. Имкон қадар кейинги босқичдаги ўйинларимизни ҳам яхшироқ ўтказишга ҳаракат қиламиз.

- “Насаф” қуйи олтиликда қатнашишини инобатга олсак, энди Суперлигада жон сақлаб қолиш асосий мақсадга айланадими?

- Қуйи олтиликка жойлашдикми, энди жамоани Суперлигада сақлаб қолишга ҳаракат қилишимиз керак. Асосий мақсадимиз шу бўлади. Аммо буни бажариш ҳам осон бўлмайди. “Насаф”ни сақлаб қолиш учун ҳам жиддий ҳаракат қилишимиз лозим. Ҳозирда барча клублар тенг кучга эга деб бежизга айтмадим. Балки бошқа клублар анчайин кучайиб кетишмагандир, бироқ “Насаф”ни бир қатор етакчилари тарк этгани ва жароҳатлар жамоамизни кучсизлантириб юборди.

“Ғаниевнинг жароҳати бошқаларнинг кетишидан кўра катта йўқотишга айланди”

- Мураббийлик фаолиятингизда биринчи марта мушкул аҳволга тушиб қолдингиз...

- “Насаф”да бош мураббий сифатида олтинчи йилни ўтказаётган бўлсам, ҳар йили медаллардан бирини қўлга киритдик. Мана шу олти йил давомида 4-5 йил мунтазам равишда Осиё Чемпионлар лигасида қатнашдик. Бунга ҳам осонликча эришилмаган. Бу йил эса натижаларимиз жуда пасайиб кетди. Лекин бу – ҳаёт, сабр қилишимиз керак. Келажакка ишонган ҳолда ишлаяпмиз. Боя айтганимдек, бундай қийинчилик бўлишига қарамай, бошқа томондан ютуқларга эришишимиз мумкин. Ёшларимиз ўзлари учун тажриба тўплаб боришяпти.

- Чўкаётган “Насаф”ни Рўзиқул Бердиев минг машаққат билан қутқариб қолишга ҳаракат қилаётгани кўриниб турибди. Лекин “Насаф” биргина Бердиевга керакми, деган савол ҳам туғилиши мумкин.

- Албатта, жамоанинг фаолияти фақат мураббийга боғлиқ эмас. Бошқа ташкилий масалалари ҳам бор. Ҳали ҳам бизда муаммолар бор ва бу давом этяпти. Лекин вақти келиб ҳамма муаммо ўз ечимини топади ҳамда вазият ўзгаради.

- Азиз Ғаниевни четга сотиш орқали клуб молиявий имкониятини бироз бўлса-да, яхшилаб олишини кутгандик. Аслида ўшанда воқеаларнинг ривожи қандай тус олганди?

- Яширишнинг ҳожати йўқ, мен ҳам Азизнинг хорижда тўп суришини ва яхшидир клубга сотилишининг тарафдори эдим. Аммо молиявий ишларга аралашмайман. Шу боис трансфер ишларини мен эмас, клуб ҳал қилади. Агар имконият бўлганида Ғаниевни четга қўйиб юбориш керак эди.

- У даволаниш учун Японияга кетди. Қачон майдонга қайтади?

- Жароҳатини ўша ерда операция қилади. Одатда бундай операциядан кейин футболчининг соғайиши учун 6-7 ой керак бўлади. Демак, Ғаниев учун мавсум тугади. Лекин у ҳали ёш ва тиришқоқ. Вақти келиб яна ўз савиясига қайтади. Лекин жароҳатлар футболнинг бир қисми.

- “Насаф”да етакчи ўйинчилар кўп эди. Ҳеч бўлмаса улардан айримларини сотиш орқали пул ишлаб олишнинг имкони йўқмиди? Айтайлик, легионерлар масаласида.

- Шартномада кўрсатилган пулларни клуб тўлаб бера олмаётганди. Шунинг учун легионерлар билан ўзаро келишган ҳолда хайрлашдик. Азиз Ғаниевга четдан яхши вариантлар борлиги ҳақида эшитгандим. Аммо қанча суммага сотилиши менга қоронғу эди. Бу трансфер нимага амалга ошмаганини билмайман. Лекин шуни айтишим керакки, Ғаниевнинг жароҳат олиб сафдан чиққани жамоамиздан кетган бошқа футболчилардан ҳам кўра катта йўқотишга айланди. У етакчимизга айланиб қолганди. Одил Ҳамробеков билан марказда яхши тандем ҳосил қилишаётганди. Умуман олганда, жамоамиздан кетган футболчиларнинг ҳеч бирини сота олганимиз йўқ. Ҳаммаси эркин агент сифатида кетишди.

“Ҳеч кимни айбламоқчи эмасман, натижа учун мен жавобгарман”

- Дрган Черан “Пахтакор”га кетганидан бери ҳали гол ура олгани йўқ. Уни кузатиб турибсизми?

- Барибир янги жамоага борганда киришиб кетиши учун вақт керак бўлади. Лекин охирги ўйинларини кўряпман ва “Пахтакор”нинг ҳужумлари асосан Черан орқали уюштириляпти. Драганни яхши биламан, ҳозирги кунда у Ўзбекистондаги легионерлар орасида энг яхшиси. Қўл остимда ўйнаган легионерлар орасида Геворкян, Черан ва Голбан энг яхшилари бўлишган.

- Агарда клубдаги молиявий муаммолар шу тарзда давом этаверса Рўзиқул Бердиев ҳам “Насаф”дан кетиши мумкинми?

- Албатта. Натижа яхши бўлмаса, ҳамма жамоада ҳам мураббий алмашади. Аниқ биламанки, мени “Насаф”га ҳеч ким узоқ йилларга “боғлаб” қўймаган. Менинг клубдаги тақдирим бўйича раҳбарият билан ҳам муҳокама қилишга тайёрман. Бу футболнинг бир қисми. Менимча, клубдан кетиш – бу энг осон иш. Лекин ундан кўра кўпроқ ҳозирги вазиятдан чиқиб кетиш ҳақида ўйлаш керак. Мураббийнинг истеъфога чиқиши бу одатий ҳол. Шу боис бунга руҳан тайёрман. Биласиз-ку, мураббий бугундан иш бошласа, эртадан бошлаб қачон истеъфога чиқарилиши мумкинлиги ҳақида ўйлашни бошлайди. Агарда менинг истеъфоим жамоам учун фойда келтирса ва бу орқали муаммолар ечиладиган бўлса эртагаёқ кетишга тайёрман.

- Тўғри, натижа биринчи ўринда туради ва мураббийнинг тақдири шунга қаратилади. Лекин “Насаф”нинг тақдири гўёки биргина сизга боғлиқдек. Лекин клубда имконият ва шароит яхши эмас. Бунинг учун эса аввало раҳбарият барча шароитларни яхшилаб бериши лозим. Сизнинг истеъфоингиз бўйича эса адолат кўринмаётгандек...

- Ҳа, шунақа бўляпти. Лекин бунда мен ҳеч кимни айбламоқчи эмасман. Умуман, бировни айбдор қилмоқчи эмасман, чунки мен шундай тарбия кўрганман. Натижа учун мен жавобгарман. Афсуски, ҳозирча натижаларимиз ёмон. Яна қайтараман: клубдан кетишим “Насаф”ни яхши томонга ўзгартирса, буни бажаришга тайёрман.

- Ёзда сизга аниқ таклифлар бўлгани ҳақида эшитгандик...

- Тўғриси, менга ўзимиздан бир қатор клублардан жиддий таклифлар бўлди. Аммо уларга ҳозирча “Насаф”дан кета олмаслигимни билдирганман. Истеъфога чиқиш муаммо эмас. Агар раҳбарият шуни хоҳлашса, буни менга айтиши керак, тўғрими?

- Яқинда Ўзбекистон футбол ассоциациясининг 1-вице президенти Умид Аҳмаджонов Қаршига келиб, вазият билан танишгандик. Ушбу ташрифдан кейин ҳам клубда ҳеч нима ўзгармадими?

- Нима десам экан, ҳозирча бирор ўзгариш сезилмади. Аҳволимиз ўша-ўша. Мукофот пуллари ҳам берилмаяпти. Футболчилар ҳаттоки, пулларининг ярмини олишга ҳам рози. Ойлик маошлар ҳам чўзилиб-чўзилиб бериляпти. Ҳаммаси ўз бошимга тушяпти, буни яхши тушуниб турибман. Аммо биргина менинг қўлимдан ҳеч нима келмайди, бошқалар ҳам ёрдам беришлари керак. Лекин ҳеч кимни айбдор қилмоқчи эмасман. Натижа учун мен жавобгарман. Раҳбариятни қониқтирмаётган бўлса ёки бошқа мутахассис билан вазиятдан чиқиб кетиш керак бўлса, уларнинг ҳар қандай қарорига розиман.

“Тан олайлик, шу куни Жанубий Корея биздан кучли эди”

- Миллий терма жамоамизга бош мураббий этиб тайинланган Эктор Купер ҳақида фикрингиз қандай?

- Бунга ижобий фикр билдираман. Бутун Ўзбекистон хорижлик мураббийни кутаётганди. Терма жамоамизда хорижлик мураббийнинг фаолият олиб бориш фурсати келганди. Ўйлайманки, бу ҳар томонлама чуқур ўйлаб чиқилган қарор бўлди. Ишонаманки, Купернинг келиши футболимиз учун омадли бўлади. У халқаро миқёсида катта тажрибага эга мутахассис. Бундан буёғига терма жамоамизнинг ўйинлари сифати ўсади ва яхши натижалар кўрсатишади. Тўғри, Купернинг ўйин фалсафасига эътибор бермаганман-у, аммо унинг тажрибасига ҳеч қандай шубҳа йўқ.

- Олимпия терма жамоамиз Осиё ўйинларининг чорак финалида Жанубий Кореяга ютқазиб мусобақадан чиқиб кетди. Бу борада нима деган бўлардингиз?

- Албатта, мағлубиятга учраганидан кейин танқид қилиняпти. Мураббийлар томонидан ҳам, футболчилар тарафидан ҳам хатолар бўлди. Лекин тан олиш керакки, Жанубий Корея ушбу учрашувда биздан кучли эди. Жамоавий ўйинни ташкил қилиш бўйича ҳам, индивидуал жиҳатдан ҳам улар кучлилик қилишди. Буни тан олиш керак. Лекин жамоамизни ортиқча айблаб бўлмайди, боиси улар ҳам ҳаракат қилишди. Фақат ҳимояда кўпроқ хатолар кузатилди. Шунчаки, кореяликлар ўйинни яхши ташкил қилишди ва қарши ҳужумларда бизни жазолашди.

- “Насаф”нинг дарвозабонлар бўйича мураббийи Денис Иванков миллий терма жамоамизда иш бошлади. Энди унинг клубдаги тақдири қандай кечади?

- Жамоамизнинг ҳар қандай аъзоси терма жамоада фаолият олиб борса буни фақат қўллаб-қувватлаймиз. Лекин терма жамоада қанча вақт ишлаши борасида у билан ҳали гаплашмадик. Унинг ўзи ҳам бу ҳақида бизга аниқ фикр билдирмади. Балки Иванков клубимиздаги ишини давом эттираверади ва терма жамоа йиғилганда у ерда ҳам ишни олиб бораверади.

Шуҳратбек Жўраев суҳбатлашди.