Xitoydagi g‘oliblik, bosh murabbiylik masalasi va “Buxoro” haqida... Yoxud Jamshid Saidov bilan muloqot

Yaqinda O‘zbekiston U-21 terma jamoasi Xitoydagi xalqaro musobaqada ishtirok etib 1-o‘rinni egallagan holda turnir g‘olibiga aylangandi. Bu esa bizda itqidorli futbolchilar ko‘pligidan dalolat beradi. Qolaversa, murabbiylarning ham salmoqli mehnatlarini e’tiborga olish lozim. Ammo o‘sha musobaqada biroz tushunarsiz holat ham kuzatilgandi. Ya’ni, avvaliga ushbu terma jamoamiz bosh murabbiyi sifatida Sunnat Abdurasulov qayd etilgandi, keyin esa Jamshid Saidov bosh murabbiy rolida ko‘rsatila boshlandi. Hozirda “Lokomotiv” futbol maktabi direktori bo‘lib ishlayotgan Saidov bilan bog‘langanimizda u bir qator masalalar xususida fikr bildirar ekan, avvalo yuqoridagi vaziyat yuzasidan oydinlik kiritib o‘tdi.

“Xitoydagi musobaqa uchun meni bosh murabbiy etib tayinlashgan”

- Bilasizmi, meni U-21 terma jamoasida ishlayotganimni ko‘pchilik bilmasdi. Sunnat Abdurasulov Vetnamdagi musobaqaga jamoani o‘zi olib ketgandi. Xitoydagi turnirda esa u menga yordamchi bo‘ldi. Rosti, bungacha Dilshod Nuraliev bilan birga yig‘inni boshlagandik. Ammo keyinchalik Nuralievni ishdan olib tashlashdi. Bunga nima sabab bo‘lgani esa menga qorong‘u. Men esa ushbu jamoada aslida jismoniy tayyorgarlik bo‘yicha murabbiy sifatida ishlayotgandim. Shu bois Sunnatning o‘zi jamoaga bosh bo‘lib Vetnamga olib ketdi. Bilsangiz, men “Lokomotiv” futbol klubi direktori bo‘lib ham ishlayman va u erda shuningdek, katta murabbiy sifatida ham faoliyat olib boraman. Sunnat esa o‘sha erda mening qo‘l ostimda ishlaydi. Vetnamga deyarli yangi jamoa bilan borib kelgandik. Keyin esa U-21 termasiga meni bosh murabbiy etib tayinlashdi. Hayriyatki, Xitoydagi musobaqadan yorug‘ yuz bilan qaytdik va 1-o‘rinni oldik. Birinchi uchrashuvda Tojikistonni 1:0 hisobida mag‘lub etdik. Keyin Myanma termasini 2:0 hisobida engdik. Uchinchi bellashuvda mezbon – Xitoy bilan durang o‘ynadik. Ochkolar bo‘yicha biz 1-o‘rinni egalladik. Xitoyliklar esa ilk turda Myanmani yutishdi. Keyin Tojikiston va biz bilan durang qayd etishdi. Shu tariqa ularda 5 ochko va biz 7 ochko bilan musobaqa g‘olibiga aylandik. Xullas, u erda birorta uchrashuvda yutqazganimiz yo‘q. U erga asosan 1997-98-99 yillarda tug‘ilgan futbolchilardan saralab olib ketgandik.

“Terma jamoada ishlash – bu murabbiylarning orzusi”

- Terma jamoada iyuldan ish boshladik. Shunchaki, assotsiatsiya meni tasdiqlaganidan keyin bu borada hech kimga intervyu bermagandim. Agarda kimgadir bu haqida xabar berganimda shu zahotiyoq ushbu ma’lumot tarqab ketardi. Biz musobaqaga tayyorlanib ketayotganimiz uchun bor e’tiborimizni Xitoyga qaratdik. Shundan keyin men haqimda xabar berasizlar, ungacha to‘xtab turaylik deb aytgandim. Lekin tan olaman, terma jamoada ish boshlashim o‘zim uchun kutilmagan bo‘ldi. Ammo har qanday mutaxassis terma jamoada ishlashni xohlaydi. Menda ham bu borada maqsadlarim bor edi. Yoshlar, olimpiya, milliy terma jamoalarda faoliyat ko‘rsatish bu – orzu. Shunday ekan, maqsadlarimdan biri amalga oshganidan xursand bo‘ldim.

“Lokomotiv”dagi faoliyatim yaxshi kechmoqda”

- “Lokomotiv” futbol maktabida ishlayotganimga bir yil bo‘ldi. “Buxoro”dan ketganimdan keyin ma’lum vaqt dam olib, keyin yana ish boshladim. Shunchaki, o‘zim bu haqida hech kimga aytganim yo‘q. Aslida esa “Buxoro”dan ketishim bilanoq menga takliflar bor edi, faqat birinchi ligadan. Lekin men doimiy yashash uchun Toshkentga oilam bilan birga ko‘chib kelgandim. Xudoga shukr, “Lokomotiv”dagi ishimiz yaxshi ketyapti. Faqat maydon masalasi biroz muammoli bo‘lib turibdi. Umuman olganda esa rahbarlar tomonidan sharoitlar yaratib berilyapti.

“Olimpiya terma jamoamiz tayyorgarlikni tezroq boshlashi kerak”

- Xizmatlarim yana terma jamoalarimiz uchun kerak bo‘lsa, doimo ishlashga tayyorman. Yaqinda Mirjalol Qosimovni olimpiya terma jamoasiga bosh murabbiy etib tayinlashdi. Lekin kuni kecha ushbu jamoaga xorijdan murabbiy kelishi mumkinligi haqida eshitdim. Lekin tezroq tayyorgarlikni boshlash kerak. Chunk kelasi yilning fevral-mart oylarida saralash bahslari boshlanadi. Boz ustiga saralash bosqichi Toshkentda o‘tkaziladi. Osiyo chempionati esa Tailandda bo‘ladi va u erda dastlabki uchtalikka kirgan terma jamoalar Olimpiadaga yo‘llanmani qo‘lga kiritishadi. Vaholanki, Osiyo qit’asida raqobat va kurash juda katta. Yaponiya, Janubiya Koreya, Avstraliya, Eron, Saudiya Arabistoni...Lekin har qanday holatda ham bizda imkoniyat bor.

“Buxoro” yana qachon 4-o‘rinni olarkin, buni Xudo biladi”

- Albatta, “Buxoro” va yana boshqa jamoalarning o‘yinlarini kuzatyapman. Biroq ularni batafsil ko‘rgani vaqtim yo‘q. Lekin internet orqali ma’lumotlarni eshitib turaman. Lekin “Buxoro”dagi hozirgi vaziyatni ko‘rish achinarli. “Navbahor”ga esa qoyil. Ular sovrinli o‘rinlar uchun jiddiy kurashishyapti. Bu orqali Osiyo Chempionlar ligasida ishtirok etish imkoniyati ularda bor. Hech bo‘lmaganda pley-off uchun kurashda qatnashishlari mumkin. Lekin “Buxoro”da samarali mehnat qilib, keyin u erdan ketganimiz yoqimsiz bo‘lgandi. Chunki kelasi yil uchun yaxshigina poydevorni hozirlab qo‘ygandik. Lekin bu – futbol. Buxoro xalqi futbolni juda yoqtiradi. Ammo ayni paytda u erda pul yo‘q. Jamoa esa 6-o‘rinda boryapti. O‘tgan yili ham ushbu pog‘onani egallashgandi. Biz esa 4-o‘rinni band etgandik. “Buxoro” yana qachon 4-o‘rinni olarkin, endi Xudo biladi. Bilasizmi, “Buxoro” jamoasi bungacha 22 yil davomida 4-o‘rinni qo‘lga kiritmagandi. Biz esa maksimal darajada ishlagandik. 2015 yili jamoani saqlab qolgan holda kelasi yilga ko‘tarilishga erishgandik. Aslida esa jamoani shakllanishi uchun uch yilga vaqt berish kerak. Mana, “Paxtakor” ham endi-endi o‘z kuchini ko‘rsatyapti. Shota Arveladze ham birinchi yili ishlaganda qiynaldi-ku. Masalan, Ektor Kuperga ham vaqt berilgan. U kelib 15 yoki 20 kundan keyin terma jamoa yutishni boshlamaydi-ku. Buni ham to‘g‘ri tushunish kerak. Har qanday jamoaga vaqt kerak bo‘ladi. Achinarlisi, biz “Buxoro” bilan 4-o‘rinni egallaganimizdan so‘ng kelasi mavsum uchun chempionlik poygasida kurashish maqsadi qo‘yilayotgandi. Ammo keyinchalik birdaniga bizni ishdan olib tashlashdi. Murabbiyning ishi shunaqa ekan-da.

Shuhratbek Jo‘raev suhbatlashdi.