Абдумалик Халаков Осиё чемпионатида илк жангини ўтказди

Хабарингиз бор, Иорданиянинг Амман шаҳрида бокс бўйича Осиё чемпионати старт олди. Бугунги кун дастуридан икки нафар вакилимизнинг жанги ўрин олган ва унинг дастлабкисида - 57 кг вазн тоифасида Абдумалик Халаков таиландлик Саравут Суктетга қарши рингга кўтарилди.

Шиддатли ва қийин кечган баҳсда ҳамюртимиз 3:2 ҳисобида ғалабани қўлга киритди. Энди, у кейинги босқичда ироқлик Муҳаммад Анвар Жасим билан тўқнаш келади.

Олдинда бизни яна бир вакилимиз Руслан Абдуллаевнинг жанги кутиб турибди. Воқеалар ривожини бизда кузатиб боринг!