Адейемига АПЛнинг гранд клубидан харидор чиқди

Лондоннинг “Челси” клуби “Боруссия Дортмунд” ҳужумчиси Карим Адейеми учун курашга кирди. 
 
Энцо Мареска сўнгги кунларда ҳужумдаги футболчиларнинг ўйинидан қониқиш ҳосил қилмаяпти. Шу боис, клуб раҳбарли баъзи футболчиларни ёзги трансферлар ойнасида сотиши мумкин. Ҳозирда ушбу рўйхатда Мудрик ва Санчо асосий даъвогар ҳисобланади. Агарда қайсидир вингер жамоани тарк этадиган бўлса, клуб янги ўйинчини жамоага жалб қилиши керак бўлади. 
 
“CaughtOffside” нашрининг ёзишича, бир неча кундан буён “аристократлар” дортмундликлар қанот ҳужумчиси ҳисобланган Адейемени клубга таклиф қилиши мумкин. Манбага кўра, қайси жамоа германиялик вингерни сотиб олмоқчи бўлса, “арилар”га энг камида 45 миллион евро тўлаши талаб қилинади. 
 
Маълумот ўрнида, 23 ёшли футболчи жорий мавсум 21 та беллашувда иштирок этиб, 6 та гол ва 5 та голли узатмага муаллифлик қилган. Унинг клуб билан шартномаси эса 2027 йилгача мўлжалланган.