АГМКнинг "Ал-Гарафа" устидан ғалаба қозонишига ишонадими? Нега доим 88-рақамда ўйнайди? Ёхуд стандартлар устаси - Марко Станоевич "Насаф"да бахтлими?

“Насаф” клуби ниҳоят 4-турда илк ғалабасини қўлга киритди. “Турон” дарвозасига жавобсиз тўртта гол уришди.

Қаршиликларнинг сербиялик легионери Марко Станоевичнинг жарима зарбасидан киритган голи жуда чиройли чиқди ва у энг яхши ўйинчиларидан бирига айланди.

Ўша учрашувдан кейин Станоевич sports.uz сайти учун интервью берди.

- Марко, сизнинг “Турон” дарвозасига стандартдан киритган голингиз жуда чиройли чиқди. Зарба беришдан аввал, аниқ мўлжални олдингизми ёки таваккалчилик биланми?

- Жарима тўпини ўз одатимга кўра, бурама зарба билан йўлладим. Буни қарангки, тўп тўппа-тўғри дарвозанинг юқори бурчагига бориб тушди.

- Нима деб ўйлайсиз, “Турон” “Насаф” учун қулай рақибми? Ўйин ҳақида фикрингиз?

- Бу менинг “Турон”га қарши биринчи ўйиним. Биринчи бўлимда ўйинимиз ўзимиз хоҳлаган даражада чиққани йўқ. Аммо учрашувнинг иккинчи ярмида майдондаги вазиятни ўзгартира олдик. Бунинг натижасида рақиб дарвозасига яна голлар киритиб, ҳисобни йирик кўринишга келтира олдик.

- “Насаф” дастлабки учта турда яхши ўйин кўрсатган бўлса-да, ғалаба қозона олмади. Бунинг сабаби нима билан боғлиқ эди?

- Дастлабки учта ўйинда “Пахтакор”, АГМК ва “Навбаҳор”га қарши беллашувларда иложи борича ғалаба қозонишимиз керак эди. Аммо бахтга қарши иш бу даражада якунлангани йўқ. Бунинг учун ўзимиз айбдормиз. Ўша баҳсларда чиройли ўйин намойиш этдик. Бироқ натижалар кутилганидек бўлмади. Лекин “Турон” билан тўқнашувда ишга янада жиддий ёндашдик ва бунинг самараси ўлароқ, натижа ҳам кутилган даражада чиқди.

- Сиз машғулотлар чоғида ҳам стандартлар устида алоҳида ишлайсизми?

- Стандарт вазиятлар доимо хавфли чиқиши учун бунинг устида алоҳида ишлаймиз. Шунинг ҳисобига рақибларимизга муаммолар туғдиришга муваффақ бўляпмиз.

- “Насаф”нинг халқаро майдонда иштирок этиши бевосита АГМКнинг “Ал-Гарафа” устидан ғалаба қозонишига боғлиқ. Олмалиқликларнинг Қатардан ғалаба билан қайтишига қанчалик ишоняпсиз?

- АГМКнинг “Ал-Гарафа”га қарши учрашувида ғалаба қозонишига ишонаман ва уларга омад ёр бўлишини тилаб қоламан.

- “Насаф”да энг қувноқ ва жиддий футболчи ким?

- Жамоамизнинг ўзагини асосан ёш футболчилар ташкил этади. Шунга монанд равишда, улар анча қувноқ. Лекин клубимиз сардори бошқалардан ёши катталиги учун анча жиддий ва зиммасидаги масъулиятни тўла ҳис қилади.

- Нима деб ўйлайсиз, “Насаф” ўтган йилги натижасини такрорлашга қодирми ёки бу қийин иш, деб ҳисоблайсизми?

- Юқорида айтганимдек, бизда асосан ёшлардан иборат яхши жамоа бор. Агар шунга мос шижоат билан тўп сурар эканмиз, ишонаманки, якунда натижа ҳам кўнгилдагидек чиқади ва биз ўтган йилги натижани такрорлай олишимиз мумкин.

- Нима учун доим 88-рақам остида тўп сурасиз?

- 88 – бу менинг таваллуд топган йилимдир. Шунинг эвазига мана, фаолиятимдаги еттинчи клубдирки, ушбу рақам остида майдонга тушяпман. Илк бор, шу рақамда “Шериф”да ўйнагандим. Аввалига 8-рақамни олишни истаганман, аммо банд бўлгани учун сал бошқача йўл тутишимга тўғри келган. Шунингдек, менга 10-рақамда ўйнаш ҳам ёқарди. Аксига олиб, “Шериф”да ўша иккала рақам бошқа футболчилар томонидан банд қилинганди.

- “Насаф”да ўзингизни тўла бахтлиман дея оласизми?

- Албатта, бахтлиман. Агар ўзимни жамоада бахтли ҳисобламасам, бу ерда қолмаган бўлардим.

- Фаолиятингиздаги энг чиройли голни айта оласизми?

- Ўзим ўйнаган клубларда доим чиройли голлар киритиб келаман (кулади). Бу ишни “Насаф”да ҳам давом эттириб келаётганимдан хурсандман.