Акмал Рустамов: "Пахтакор" бош мураббийи учта ўйинимизни кўриб кетди, мен ҳам "Қайрат" билан ўйинини томоша қилдим"

Навоийнинг “Қизилқум” клуби ҳам “Мавсум-2026” учун режа асосида тайёргарлигини давом эттирмоқда. Жамоа Туркиянинг Анталия шаҳрида ўқув-машғулот йиғинларини ўтказиб қайтди. Сафардан қайтиш чоғида “Қизилқум” бош мураббийи Акмал Рустамов самолётдаги парвоз вақтида Sports.uz журналистининг саволларига жавоб қайтарди.

- “Қизилқум”нинг Анталиядаги йиғинидан қанчалик кўнглингиз тўлди? 

- 15 декабрь куни Навоий шаҳрида бошладик. 28 декабрга қадар биринчи ўқув йиғинимизни ўтказдик. Иккинчи тайёргарлик босқичимиз 5 январдан бошланди. 15 январгача футболчиларнинг жисмоний тайёргарлигига эътибор бердик. Кейин Тошкентга бордик ва ўртоқлик учрашувида иштирок этдик. 21 январь куни тиббий кўрикдан ўтдик ва Туркиянинг Анталия шаҳрига йиғин ўтказиш учун жўнаб кетдик. У ерда 7 та ўртоқлик ўйинини ўйнадик. Ниятимиз техник ва тактик услубларни жойига қўйиб олиш эди. Ўйлайманки, ёмон бўлмади. Таркибимизни асосий негизи сақлаб қолинган. 4-5 нафар янги ўйинчилар қўшилишди. Ўйлайманки, уларни киришиб кетиши қийин бўлмади. Биринчи турда “Пахтакор”га қарши майдонга чиқамиз, яна вақтимиз бор. Йигитларимиз руҳий ва жисмоний жиҳатдан ҳам тайёрлар. Иккита футболчимизда бироз жароҳатлар бор. Унгача сафга қўшилишади, деган умиддаман. Йиғиндан бош мураббий сифатида кўнглим тўлди. Тошкентда яна битта ўртоқлик ўйинимиз бор. Кейин “Пахтакор”га қарши илк тур беллашувига шай ҳолатда бўламиз.

- Трансфер борасида адашмасам 5 нафар янги ўйинчи олдингиз. Нима учун нисбатан камроқ селекция қилдингиз?

- Бу ҳақида айтадиган бўлсам, 6 та футболчи олдик. Маҳаллий ёшларимиз, U21 жамоамиздан иқтидорли йигитларни ҳам асосий таркибга жалб қилишни бошладик. Улар ўзини оқлайди, деган умиддаман.

- Демак, таркибдан қониқяпсизми ёки трансфер ойнаси ёпилгунича яна янги ижрочилар пайдо бўлиши мумкинми?

- Мураббийлар штаби билан келишилган ҳолда бор таркибимизни сақлаб қоламиз. Ўзимизни ёш футболчиларга ҳам кўпроқ эътибор қаратиш ва уларни келажакда асосий таркибга тайёрлаш ниятимиз бор.

- Ҳозирги таркиб нуқтаи назаридан қарайдиган бўлсак, “Қизилқум”нинг янги мавсумдаги асосий вазифаси нимадан иборат?

- Бош мураббий сифатида айта оламанки, ўтган йили жамоани қабул қилиб олганимда 13-14-ўринларда эди. Кейин 9-поғонада тугатдик. 8-ўринни олишимиз ҳам мумкин эди. Икки-учта учрашувда очко йўқотмаганимизда 6-ўринни қўлга киритишимизга ҳам имкон бор эди. Ўйлайманки, тўғри йўлдамиз ва шу руҳда ҳаракат қилсак, кучли бешталикка киришга ҳаракат қиламиз.

- Дастлабки турда “Пахтакор” билан, кейин “Андижон”га қарши ўйнайсизлар. Умуман, қуръа ҳақида фикрингиз қандай?

- Қуръа шундай нарсаки, барибир ким биландир қаердадир бошлашингиз керак. Ким билан бўлса ҳам биринчи турда уйда, мухлисларимиз қаршисида бошласак ёмон бўлмасди, деган умид бор эди. “Пахтакор” билан тушибмиз, уларга қарши майдонга чиқиб жанг қиламиз.

- Анталиядаги йиғинлар давомида “Пахтакор” бош мураббийи “Қизилқум” иштирокидаги учрашувларни стадионда кузатди. Сизда ҳам “Пахтакор” ўйинларини кўриш имконияти бўлдими?

- “Пахтакор” бош мураббийи келиб 3 та ўйинимизни кўриб кетди. Мен ҳам уларни “Қайрат” билан ўйинини томоша қилиб келдим. Барибир бизни ҳам, “Пахтакор”ни ҳам ўртоқлик учрашуви билан таққослайдиган бўлсак, чемпионат ўйинида 100 фоиз фарқ бўлади. Ҳозир жамоалар икки маҳал машғулотларни ўтаб, ўйинга чиқишяпти. Чемпионатга яқин машғулотлардаги “нагрузкалар” камаяди. Улар ҳам, биз ҳам ўйинга жонлироқ ҳолатда етиб борамиз. Чемпионат баҳсида бошқача “настрой” бўлади.

- Бош мураббий сифатида селекцияда ўзингиз хоҳлаган барча ўйинчиларни йиға олдингизми ёки қайсидир мўлжаллаб қўйган футболчилар қўлдан бой берилдими?

- Бир жиҳатга тўхталиб ўтмоқчи эдим, 6 та легионер олиш мумкин, майдонда 5 тасига рухсат бор. Легионерларга кўп пул сарфлаб, захирада қолгандан кўра уни ўрнига ўзимизни маҳаллий футболчи улғайсин деган мақсадда олтинчи легионерни олмадик, 5 таси билан кифояландик. Ўзбекистонлик маҳаллий футболчиларимиздан ҳам кўнглим тўқ. Ҳа, камчиликлар бор, буни тўғрилашга вақтимиз бор. “Пахтакор”га қарши биринчи тургача буни устида ишлаймиз ва яхши бўлади, деган умиддаман.

- Янги мавсумдан нималарни кутяпсиз?

- Ҳамма жамоа кучайиб боряпти. Тўғрироғини айтадиган бўлсак, водий жамоалари анча кучайди. Яхши ўйинчиларни олишяпти. Рақобат жиддий бўлади. Олдинлари чемпионат ўртасига келганда 5 та жамоа узоқлашиб кетган, 5 таси орқада бўларди. Энди бундай бўлмайди. Бу йил кураш жуда қаттиқ бўлади.

- “Қизилқум”дан бу йил “чақилмас ёнғоқ” ролини бажаришини кутсак бўладими?

- Бизни ўйинчиларимизда биринчи навбатда характер бор. Ички муҳитимиз ҳам жуда яхши. Ҳаммасини бирлаштирсак эртага чемпионатда қийналмаймиз. Ҳар бир учрашувда охирги ўйинга чиққандек жанг қиламиз. Ниятимиз жамоани Суперлигада сақлаб қолиш ёки кучли саккизталикка кириш эмас, балки янада юқори ўринларга кўтарилишга ҳаракат қиламиз.