"Ал Ҳилол" ҳужумчи учун "Бавария"га 132 млн еврогача таклиф беришга тайёр

«Ал-Ҳилял» клуби ҳужум чизиғини кучайтириш мақсадида трансфер бозорини фаол ўрганаётгани хабар қилинмоқда. Саудия Арабистони гранди Мюнхеннинг «Бавария» жамоасида ўйнаётган ярим ҳимоячи-вингер Луис Диас билан музокара олиб бормоқда.

Инсайдер Саша Тавольери ижтимоий тармоқларда ёзишича, «Ал-Ҳилял» колумбиялик футболчига солиқлардан кейин йилига тахминан 25 миллион евро маош таклиф қилишга тайёр.

Манбага кўра, ҳозирча саудияликлар «Бавария» раҳбарияти билан расмий мулоқот бошламаган. Клуб аввал 29 ёшли футболчининг ўзи билан келишувга эришмоқчи, шундан кейингина немис жамоаси билан музокарага киришиш режалаштирилган.

Хабарларда таъкидланишича, «Ал-Ҳилял»нинг ёзги трансфер ойнаси учун умумий бюджети 350 миллион евродан ошиб кетади. Агар Луис Диас саудия клубига ўтишга рози бўлса, унинг трансфери учун 105 миллион евродан 132 миллион еврогача миқдорда тўлов амалга оширилиши мумкин.