«Ал-Наср» «Барселона»нинг трансферини барбод қилиши мумкин

«Аль-Наср» ҳужумчиси Жоау Фелиш яна «Барселона» сафида тўп суришни истамоқда. Унинг режасига кўра, Саудия клуби билан амалдаги шартномаси якунига етиши кутилмоқда, шундан сўнг португалиялик футболчи каталонияликлар сафига эркин агент сифатида қайтишни мўлжаллаган.

Бироқ яқинда пайдо бўлган маълумотларга кўра, бу сценарий амалга ошмаслиги мумкин. «Аль-Наср» Жоау Фелиш билан тузилган шартномани бир томонлама тарзда узайтириш ҳуқуқига эга. Футболчи Саудия Арабистони клубига ўтаётганда айнан шу бандга розилик билдирган.

Агар «Аль-Наср» ушбу имкониятдан фойдаланиб, Фелиш билан шартномани автоматик равишда узайтирса, у ҳолда унинг «Барселона»га эркин агент сифатида ўтиши амалга ошмай қолиши мумкин.