Александр Хомяков
Ads

Ўзбекистон Лига кубоги чорак финал босқичидан ўрин олган "Динамо" ҳамда "Андижон" жамоалари ўртасидаги (2:1) ўйиндан сўнг меҳмонлар устози Александр Хомяков учрашув борасидаги ўз фикрларини билдириб ўтди.

"Бугун томошабоплиги бўйича ҳам, шиддат борасида ҳам яхши ўйин бўлди, дея оламан. Афсуски, мағлуб бўлиб, турнирни тарк этдик. Тўғри, бугун зич тақвим графиги сабабли, бир қатор футболчиларга дам олиш имконини бергандик, аммо шунга қарамай, йигитлар ёмон ўйин намойиш этишмади. Иккинчи бўлимда гол ўтказиб юборган бўлсак-да, жамоам курашдан четда қолмади ва охиригача жанг қилди, дейиш мумкин. Нима ҳам дердим, “Динамо”ни ярим финалга чиққани билан табриклайман ва кейинги ҳал қилувчи ўйинларда омад тилаб қоламан.

Рақиб жамоа ҳақида? “Динамо” жамоаси таркибидаги номлар билан эътиборга тушмаса-да, курашувчанлиги, ўйинида мураббийнинг имзоси борлиги билан ҳам ҳурматга сазовор жамоадир. Жамоа ҳар қандай рақиб билан майдонда қўрқмай, кураша олади. Таркибида ёрқин номлар йўқ, аммо жамоа бор, дейиш мумкин.

“Андижон” ўйини менинг қўл остимда ижобий томонга ўзгараётгани ҳақида эшитиш ёқимли бўлса-да, ўз фикримни билдирадиган бўлсам, мен ўз жамоамнинг ўйини янада яхшиланишини кутаяпман ва бунинг учун ҳали кўп ишлашимизга тўғри келади. Мен ҳали жамоам ўйинида катта ўзгаришлар кўраётганим йўқ. Биз ўйиндан-ўйинга кучайиб боришимиз шарт.

Чинданам, якшанба куни “Навбаҳор”га қарши “Андижон”ни жуда ҳам муҳим баҳс кутиб турибди. “Водий дербиси” доим шиддатли ўтиши барчага маълум. Таркибда ротация бўлиши аниқ. Сабаби биз кўп футболчиларимизга дам бердик, улар “Навбаҳор”га қарши ўйинда янгича иштиёқ билан майдонга тушишларини кутаяпман. Ўйлайманки, “Водий дербиси”да “Навбаҳор” фаворит саналади. “Андижон” эса мухлислари қаршисида бор куч ва имкониятини ишга солади. Икки жамоани ҳам осон бўлмаган ўйин кутаяпти", - деб Хомяковнинг сўзларини келтириб ўтди "Динамо" матбуот хизмати.