Алишер Шоғуломовнинг 25 ёшида бутсаларини михга илишга нима мажбур қилди?

Иқтидорли ҳужумчи Алишер Шоғуломов охирги пайтларда ҳеч қаерда кўриниш бермаётганди. Бунгача эса у «Локомотив» клубида фаолият кўрсатиб келаётганди. Аммо шунда ҳам футболчини майдонда кам кўраётгандик. Очиғи, Шоғуломовда иқтидори бўлса-да, негадир ўйнаётган жамоаларида ўз ўрнини топа олмади. Охирги маълумотга кўра ушбу ўйинчи 25 ёшидаёқ бутсаларини михга илишга қарор қилибди. Қизиқ, футболни бу қадар эрта тугатишига нима сабаб бўлди? Айни пайтда эса у «Оқ-тепа» жамоасида ишлаётгани ҳам маълум бўлди. Шу боисдан куни кеча ўзи билан боғландик.

- «Оқ-тепа» клубида иш бошлаганингиз ҳақида эшитдим. Футболчилик фаолиятингизни тугатишингизга нима мажбур қилди?

- Тўғрисини айтсам, фаолиятимни тугатишимга жиддий сабаб бўлгани йўқ. Асосий таркибда икки йилдан бери ўйнамаётгандим. Менинг тушунчам шундай: футболчи ўйнаганга яраша аъло даражадаги ўйинчи бўлиши керак ва доим кучли клубларда тўп суриши лозим. Охирги пайтларда эса яхши ўйин кўрсата олмадим. Натижада ўзимнинг ўйинимдан қониқмай келаётгандим. Ҳаммасини ўйлаб кўргач, футболчилик фаолиятимни якунлашга қарор қилдим.

- Бундай қарорга келишингизга кимдир туртки бердими ёки…

- Йўқ, бу шахсий қарорим бўлди. «Локомотив» жамоасида асосий таркиб ўйинчисига айлана олмадим. Шу боис ўзимдан-ўзим хафа бўлдим десам ҳам бўлади. Балки мураббийнинг қарашлари бошқача бўлгандир. Охирги ишлаган мураббийим Андрей Фёдоров бўлди. Лекин мен уни аъло даражадаги мураббий деб ҳисобламайман. Яхши биласиз, ўзимизнинг «Оқ-тепа» жамоамиз бор ва дадам ушбу клубнинг президенти. Мен эса бевосита дадамга ёрдамчи бўлиб ишга ўтдим.

- «Локомотив»да бўлмаса, балки бошқа клубда имкониятларингизни намойиш этишингиз мумкин эди-ку. Бундай истагингиз йўқмиди?

- Менинг тарбиям ва ҳарактерим шунақа-да, ўйнагандан кейин албатта яхши жамоада тўп суриш керак. Вадим Абрамов ўз интервьюсида 25 ёшимда терма жамоада ўйнай олмаслигимни билганимдан сўнг футболчиликни ташлаганман деб айтди. Мен ҳам унинг гапларига қўшиламан ҳамда у билан қароримиз бир хил бўлди.

- Кўпчилик фаолиятингизни тугатганингизни ва «Оқ-тепа»да ишлаётганингизни ҳали билишмайди. Бу жамоада қандай ишлар бандсиз?

- Яқин орада мураббийлик лицензияларига ўқиш ниятим бор. Келажакдаги мақсадларим эса катта. Худо хоҳласа, Голландияга бориб мураббийлик курсларида ўқимоқчиман. Адашмасам, бизда ҳали мураббийларимиз хорижда ўқишмаган. Насиб қилса, қишда «Аякс» клубида малакамни оширишни режалаштириб турибман. Бундан буёғига умримни мураббийликка бағишламоқчиман.

- Хўш, ундай бўлса, шу пайтгача босиб ўтган йўлингизга назар ташлайдиган бўлсангиз, нималарни айтган бўлардингиз?

- Футболчилик ҳаёти жуда ҳам ажойиб. Чунки инсон яхши кўрган иши билан машғул бўлади ва бунинг ортидан пул топади. Умуман олганда, футболчиликда ўзига яраша ҳиссиётлар бўлади. Менинг хулосам бўйича, футболчиликдан кўра мураббийликда ўқиб, излансам футболимиз учун кўпроқ фойдам тегади деб ўйлайман. Бу борада эса янгилик олиб кирмоқчиман. Барибир хорижда футбол савияси бошқача. Ваҳоланки, уларда ҳам биздаги каби инсонлар ишлашади. Лекин у ерларда футболни бошқача ўргатишади.

- Фаолиятингизни бу қадар эрта тугатганингиздан қачондир афсусланиб қолмасмикансиз?

- Балки афсусланарман. Лекин мен футболдан бутунлай кетганим йўқ-ку. Менинг ҳали футболдаги мақсадларим катта.

- Фаолиятингизда барқарорликни ушлаб қолиш сиз учун қийин кечгандек…

- Бунинг ҳаммаси ўзимнинг айбим деб ўйлайман. Балки яхши машғулот қилмагандирман. Биламан, ёшлигимдан анча қизиққон бўлганман ва тезда жахлим чиқарди. Шунинг учун бир қатор мураббийлар билан гап талашганман. Буларнинг ҳаммаси мен учун минус бўлди деб ўйлайман. Агарда 16-17 ёшимда шу нарсаларни ўйлаганимда ва билганимда эди, ҳозир умуман бошқача савияда ўйнаётган бўлардим. Ҳаммасига ўзим айбдорман. Боя айтганимдек, энди ўзимни мураббийликка бағишлайман ва бу йўлдаги режаларим катта. Бизга четдан мутахассисларни олиб келишяпти. Мана, «Пахтакор», «Навбаҳор», «Бухоро» каби клубларда хорижлик мураббийлар ишлашяпти. Лекин ўзбек мураббийлари ҳам аслида улардан кам эмаслар. Фақат кўпроқ ўқиш ва изланиш керак. Ҳамма нарсага ўзимиз эриша оламиз.

- Футболчилик фаолиятингизни бошидан бошлаш имконияти тақдим этилганда биринчи навбатда нимани ўзгартирган бўлардингиз?

- 14 ёшимда Польшанинг «Легия» жамоасига борганман. Ўшанда мураббийлар ўйинимни ёқтиришиб, мени клубда олиб қолишмоқчи бўлишганида қолмасдан қайтиб келганман. Ўшанда мен учун жуда яхши имконият эди. Ҳаттоки, менга ўшанда пул ҳам беришган. Лекин мени пул унчалик қизиқтирмасди. Яхши савиядаги жамоага боргандим. «Легия»нинг ёшлар жамоасида ўзимни кўрсатганимдан кейин менга шартнома таклиф қилишганди.

- Нима учун рози бўлмагансиз?

- У пайтда ёш эдим ва ҳаётим Ўзбекистонда бўлишини хоҳлаганман.

- Дарвоқе, яқинда ЎФА келишилган ўйинлар ва тотализаторга қарши суриштирувлар натижасига кўра «Оқ-тепа»да ишлаган мураббий Ярослав Крушельницкийни дисквалификация қилди. Бунга муносабатингиз қандай?

- Дадамнинг футболга бўлган қизиқиши баланд. Агар Ўзбекистон миллий терма жамоаси ютқазадиган бўлса, ҳеч ким билан гаплашмайди, тушкунликка тушиб қолади. Ўзининг жамоаси – «Оқ-тепа» ютқазганида ҳам қон босимлари ошиб кетади, жуда қайғуради. Мен эса ҳаммасини кўриб турибман ва бу жамоада мураббийларнинг қилаётган ишлари ҳам ёқмаётганди. Жамоа эса ютқазаётганди. Шу боис дадамнинг ёнига келиб, яқиндан ёрдам беришга ҳаракат қиляпман. Ҳозирча натижалар ёмон эмас, бешта ўйинда бешта ғалаба бўлди. Жамоамизда эса Равшан Бозоров бош мураббий. Фақат соғлигида бироз муаммолар борлиги туфайли ишга кела олмаётганди. Унга Саидкомил Акбармов ёрдам беряпти.