Файзуллаев ва Шомуродов гол урди, аммо...

Туркия чемпионатининг 14-турида “Истанбул Башакшеҳир” сафарда “Касимпаша” жамоаси меҳмони бўлиб, ўта қийин ўтган учрашувда уч очкони қўлга киритишни уддалади.

Энг эътиборли жиҳати, ушбу баҳсда Ўзбекистон миллий терма жамоасининг икки етакчиси – Элдор Шомуродов ва Аббосбек Файзуллаев бошланғич таркибда майдонга тушди.

22 ёшли Файзуллаевнинг ўйинда иштирок этгани мухлисларни айниқса хурсанд қилди. Чунки Аббос октябрь ойидаги халқаро танаффусда Ўзбекистон миллий терма жамоаси йиғини доирасида ўтказилган учрашувда жароҳат олган эди.

“Касимпаша”га қарши илк дақиқалардан ўйнаган Файзуллаев учрашув қаҳрамони бўлди. Легионеримиз биринчи бўлим ўрталарида жарима майдончаси ташқарисидан белгиланган жарима тўпини суперзарба билан рақиб дарвозасига жойлаб ҳисобни очди.

Баҳснинг биринчи ярмида катта устунликка эришган “Истанбул Башакшеҳир” танаффусга чиқиш олдидан Амин Аритнинг голи эвазига икки тўп фарқи билан олдинга чиқиб олди.

Ўйиннинг кульминацион нуқтаси меҳмонларнинг германиялик легионери Дави Зелькенинг иккинчи сариқ карточка олиб, майдондан ҳайдалган паллага тўғри келди. Бир киши кўп бўлиб ҳаракат қилган “Касимпаша” ҳисобдаги фарқни қисқартиришга эришди.

Учрашув охири мезбонлар устунлигида ўтди. “Башакшеҳир” бор эътиборини ҳисобни ушлаб қолиш учун ҳимояга қаратди. Шундай бўлса-да, учрашувнинг сўнгги дақиқаларида Элдор Шомуродов рақиб дарвозасини ишғол қилди ва ўйинга якуний нуқтани қўйди. "Истанбул Башакшеҳир" ўзбек футболчиларининг голлари эвазига 3:1 ҳисобида зафар қучди. 

Шу тариқа, Элдор голлар сериясини бешта ўйинга, умумий голлари сонини 10 тага етказди.

Бу турга қадар Суперлига тўпурарлари пойгасида “Трабзонспор” ҳужумчиси Пол Онуачу билан биринчи ўринни бўлишиб турган Элдор Шомуродов энди “тахт”ни рақобатчисига топширишга мажбур бўлди. Чунки нигериялик ҳужумчи бу турда “Коньяспор” дарвозасини икки маротаба ишғол қилиб, чемпионатдаги умумий голлари сонини 11 тага етказди.

Шомуродов 10 та гол билан иккинчи ўринда қолган бўлса, рақиблар дарвозасини етти мартадан ишғол қилган “Галатасарой” юлдузи Мауро Икарди ва “Фенербаҳче” етакчиси Юссуф Эн-Несири учинчи ўринни бўлишиб турибди. Бу футболчилар 14-тур учрашувини 1 декабрь куни ўзаро тўқнашувда ўтказади.  

“Истанбул Башакшеҳир” эса, навбатдаги турда чемпионатнинг энг кучли клубларидан ҳисобланган “Фенербаҳче”ни қабул қилади. Бу учрашув 7 декабрга белгиланган.  

Ҳусанов жойига мўлжалланган футболчини икки рақиб “юлиб” кетмоқчи

Япон футболчиси Қозоғистонни эмас, Ўзбекистонни танлади

Ҳусанов мухлисларига яхши янгилик бор!

Ҳусанов масаласида сабр қилинг!

Аламли мағлубиятдан кейин Ҳусановнинг ўйини қандай баҳоланди?