Ҳусанов жойига мўлжалланган футболчини икки рақиб “юлиб” кетмоқчи

“Манчестер Сити” 2026 йилги икки трансфер ойнаси даврида ҳимоянинг ўнг қанотига “Ньюкасл”да ўйнаётган Валентино Ливраментони олиб келишга уриниб кўради.

Caught Offside нашрининг маълум қилишича, энди англиялик ҳимоячи учун курашга Премьер-лиганинг икки қудратли клуби – “Манчестер Юнайтед” ва “Арсенал” ҳам қўшилди.

Манбага кўра, “қарғалар” 23 ёшли футболчини сотишни истамаётгани ва Ливраментонинг ўзи ҳам клубни ўзгартиришга шошилмаётгани даъвогар клублар ишини янада мураккаблаштиради.

Шунга қарамай, “Манчестер Сити” январь ойидаги қишки трансферлар ойнаси даврида Ливраментони ўз сафига қўшиб олишга дастлабки қадамни ташлайди. Бу орқали “шаҳарликлар” Ливраментога ёзда таклиф юборишни мўлжаллаётган “Манчестер Юнайтед” ва “Арсенал”ни ортда қолдирмоқчи.

Айни пайтда “Манчестер Сити” ҳимоясининг ўнг қанотида ўйнаб келаётган Матеуш Нуньеш, Рико Льюис ва Абдуқодир Ҳусановнинг асосий амплуаси умуман бошқа. Нуньеш ва Льюис асосан ярим ҳимоячи сифатида шаклланган. Жорий мавсумда уларнинг ўнг қанот ҳимоясидаги ҳаракатлари мураббийлар штабини қониқтирмагани учун Хосеп Гвардиола бу жойда аслида марказий ҳимоячи бўлган Абдуқодир Ҳусановни ўйнатиб келмоқда.

Валентино Ливраменто “Челси” тарбияланувчиси ҳисобланади. Иқтидорли ўйинчига “аристократлар” асосий таркибидан жой тегмагач, у 2021 йилнинг ёзида 26,2 миллион евро эвазига “Саутгемптон”га ўтиб кетган эди.

“Ньюкасл” эса, Ливраментони 2023 йилда ўз сафига қўшиб олиш учун “авлиёлар” ҳисоб рақамига 37,2 миллион евро ўтказиб берди ва футболчи билан 2028 йилнинг 30 июнигача давом этадиган шартнома имзолади.

Transfermarkt порталидаги маълумотларга кўра, айни пайтда футболчининг бозор қиймати 40 миллион еврога кўтарилган.

Файзуллаев ва Шомуродов гол урди, аммо...

Япон футболчиси Қозоғистонни эмас, Ўзбекистонни танлади

Ҳусанов мухлисларига яхши янгилик бор!

Ҳусанов масаласида сабр қилинг!

Аламли мағлубиятдан кейин Ҳусановнинг ўйини қандай баҳоланди?