Алонсо Мбаппе қачон майдонга тушиши мумкинлигини айтди

"Реал Мадрид" бош мураббийи Хаби Алонсо ҳужумчи Килиан Мбаппенинг соғлиғи тикланиб, 27 июнь куни бўлиб ўтадиган Клублар ўртасидаги жаҳон чемпионати гуруҳ босқичининг 3-турида "Ред Булл Залцбург"га қарши ўйинда майдонга тушишига умид билдирди. Аввалроқ, француз футболчиси ўткир гастроэнтерит сабабли касалхонага ётқизилган эди.

"Мбаппе ҳозир яна меҳмонхонага қайтди, у шифохонани тарк этди, шунинг учун ҳолатни кузатамиз. Менимча, у якшанба куни бўлиб ўтадиган ўйинда иштирок этолмайди, лекин кейинги баҳсда унга таянишимиз мумкин бўлишига умид қиламиз", — деган Алонсо сўзларини Madrid Universal келтиради.

Эртага, 22 июнь куни "Реал" Клублар ўртасидаги жаҳон чемпионати 2-тури доирасида Мексиканинг "Пачука" жамоасига қарши ўйнайди. Ўйин Тошкент вақти билан соат 00:00 да бошланади.