Амалдаги чемпионлар баҳси, дастлабки турданоқ 2 та супер ўйин - АПЛда янги мавсум старти (превью)

Англия Премьер-лигаси янги мавсумининг бошланиши бу гал у қадар орзиқиб кутилмаган бўлиши ҳам мумкин. Сабаби, чемпионат июль сўнгида ниҳоясига етди. Ундан кейин эътиборимиз Чемпионлар Лигаси ва Европа Лигаси баҳсларига қаратилди. Шу ўринда таъкидлаб кетиш жоизки, Суперлиганинг марказлашган форматда ўтказилиши ҳам август охирини безаб берди. Ой бошида Миллатлар Лигаси баҳслари терма жамоалар ўртасидаги ўйинларни соғиниб қолган мухлисларга таскин берди. Энди танаффуссиз янги мавсумни ҳам бошлайверамиз. Дастлабки турданоқ етарлича катта тўқнашувлар мавжуд. Бошладик!

“Фулхэм” - “Арсенал”

“Тўпчилар” АПЛнинг очилиш учрашувларини ўтказишга кўникиб қолган ва ҳар доим стартни “ёндириб” беради. Бу гал интрига 2 баробар юқори бўлиши ҳам аниқ. Илк ўйиндаёқ Лондон дербиси! “Фулхэм” 2019 йилда тушунарсиз ўйин ўтказди. Мавсум дебютанти сифатида иштирок этган жамоа бир қатор катта номларни ўз сафига қўшиб олди. АПЛга қайтган мавсумида ўз трансфер рекордини янгилаган клуб ўша мавсумнинг ўзидаёқ элитани тарк этди. Серхио Рико, Раян Бабель, Андре Шюррле, Жан Мишел Сери ва яна кўплаб яхши даражали футболчиларни ўз сафига қўшиб олган “Фулхэм”нинг Чемпионшипга тушиб кетиши ростдан ҳам кутилмаган ҳолат эди. Ушбу мавсумда ҳам “Торино”дан Аина, ПСЖдан Ареола ва яна бир нечта катта харидлар амалга оширилди. 

“Арсенал” эса Артета бошчилигида ўтган мавсум ҳисобидан 2 та титул ютишга эришди. Ярим мавсумдаёқ испан мутахассиси жамоасига Англия кубоги ва Суперкубогини олиб берди. Стэн Кронке “Ливерпуль” устидан қозонилган ғалабадан сўнг бироз “юмшаб”, ҳимояга Габриэлни олиб берди. 

Жамоалар ўзаро 57 маротаба тўқнаш келган. Уларнинг 39 таси “канонирлар” фойдасига ҳал бўлган. 8 та учрашувда “Фулхэм”нинг қўли баланд келган. Яна 10 та учрашувда томонлар муроса кўчасини танлаган.

Ушбу ўйин 16:30 да бошланади ва сайтимизда матнли трансляция тарзида эътиборингизга ҳавола этилади.

арсенал

“Ливерпуль” - “Лидс”

Премьер-лига ва Чемпионшип ғолиблари дастлабки турдаёқ тўқнаш келади. Ўзига хос тарихий тўқнашув. Катта авлод вакиллари учун ушбу қарама-қаршилик нисбатан каттароқ интригага эга, деб қаралади. Бугунги учрашувда гол киритган тақдирда Муҳаммад Салоҳ кетма-кет 4 мавсум давомида 1-турда гол киритган “Ливерпуль”нинг илк футболчисига айланади. 

Яна бир қизиқарли ҳолат шундан иборатки, “Лидс” кетма-кет 12 маротаба АПЛнинг 1-турида мағлубиятга учрамаган ягона жамоа ҳисобланади. Бугун улар ўз натижаларини яхшилаб олишлари мумкин. 

Ўзаро учрашувлар тарихига назар ташласак, табиийки, мерсисайдликлар устунлигининг гувоҳи бўламиз. Шу пайтга қадар бўлиб ўтган 115 та учрашувнинг 58 тасида “қизиллар” ғалаба қозонган. 27 та беллашувни “Лидс” футболчилари ўз фойдаларига ҳал қилишган. Яна 30 та ўйин дуранг билан якунланган. 

“Ливерпуль” - “Лидс” тўқнашуви 21:30 да старт олади ва ушбу баҳсни ҳам сайтимизда матнли трансляция усулида кузатиб боришингиз мумкин.

ливерпуль

“Вест Бромвич” - “Лестер”

“Вест Бромвич” ҳам ушбу мавсум дебютанти сифатида ҳаракат қилади. Чемпионшип вице-чемпионлари илк турданоқ катта жамоага қарши ўйнайди. Ушбу жамоа мунтазам равишда чемпионшип ва элита орасида саргардон бўлиб келади. “Лестер” эса таиландлик сармоядорлар кўмаги билан анча стабил жамоага айланиб қолди. Ўтган мавсумнинг катта қисмини Чемпионлар Лигаси поғоналарида ўтказган жамоа фақат сўнгги турга келибгина ушбу поғонадан мосуво бўлди. Энди “тулкилар” Европа Лигасига файз бериб туради. Ушбу клуб учун ҳар мавсум қайсидир етакчисидан айрилиш одат тусига кирмоқда. Канте, Дринкуотер, Маҳрез, Магуайр ва энди Чилуэлл. Аммо шу жиҳат ҳам борки, ҳар мавсум улар янги номларни кашф этиб бера олади. Ҳали жамоа устуни бўлиб турган Шмейхель, Сеюнжу, Перрейра, Мэддисон ва Варди каби футболчилар ўз жойида турибди. Улар ёнига Пратт, Барнс, Айозе Перез ва Грэй каби футболчилар ҳам қўшилиши катта эҳтимол. 

Умумий тарих жиҳатидан олиб қараганда, “Вест Бромвич” “Лестер”дан каттароқ клуб ҳисобланади. Буни ўзаро учрашувлар тарихи ҳам айтиб турибди. Жамоалар 111 марта тўқнаш келган бўлиб, 51 тасида ғарбий мидлендликлар ва 37 та баҳсда эса шарқий мидлендликлар ғалаба қозонган. Мидлендликлар ўртасидаги ўзига хос дербиларнинг 23 таси дуранг билан якунланган. 

Ушбу беллашув эртага соат 18:00 да старт олади.

варди

“Тоттенхэм” - “Эвертон”

Турнинг марказий учрашувига ҳам етиб келдик. “Тоттенхэм” устози Жозе Моуриньо ёз давомида бир нечта ақлли трансферлар қилди. Аввало, Мэтт Доэртини ўнг қанотни кучайтириш учун олиб келди. Эрик Дайернинг ҳимояга ихтисослашуви сабабли таянч зонаси анча бўшаб қолди. Ваньяма ва Сиссоко юқори даражада ўйнай олмаяпти. Пьер-Эмиль Хёйберг айни шу позицияни мустаҳкамлаш учун олиб келинди. Шунингдек, дарвозабон масаласида тушунарсиз қарор қабул қилинди. Албатта, Жо Харт “шпорлар” таркибига текинга келиб қўшилди. Аммо шундоқ ҳам захира посбони вазифасини Газзанига аъло даражада амалга ошираётган бир пайтда учинчи ўртамиёна даражадаги посбон қанчалик керак эди? 

“Эвертон” эса ёзги трансферлар ойнасида ярим ҳимояни буткул янгилади. Хамес, Аллан ва Дукуре энди “ирисчилар” лойиҳасида иштирок этади. Ливерпулнинг иккинчи рақамли жамоаси декада мобайнида мана шундай харидларни тўхтовсиз амалга оширди. Бироқ Девид Мойесдан сўнг улар мураббийга ҳеч ялчимади. Албатта, Роберто Мартинес ҳам яхши даражадаги мутахассис. Аммо у ҳам клубни эгалари хоҳлагандек даражага чиқара олмади. Энди еврофутболда каттагина шахс ҳисобланадиган Карло Анчелотти клуб бош мураббийи. У ўзи билан ишлаган бир нечта кучли футболчиларни жамоага олиб келиб улгурди. Трансферлар ўз йўлига, натижа муҳим. Мана тайёр синов. Илк турдаёқ рақиб - “Тоттенхэм”.

Ўзаро 177 та учрашувнинг 68 тасида “тақачилар” ғолиб бўлган. 54 та беллашувда “Эвертон” ғалаба қозонган. 55 та баҳсда томонлар муроса кўчасини танлаган. 

Ушбу тўқнашув эртага соат 20:30 да бўлиб ўтади.

тоттенхэм

“Шеффилд” - “Вулверхэмптон”

Ушбу мавсумда еврокубокларда кўришни истганимиз икки клуб 1-турда ўзаро беллашади. “Шеффилд”да таркиб яхши томонга ўзгаргани йўқ. Аксинча, Дин Хендерсон ижара муддати тугаганлиги сабабли МЮга қайтиб кетди. Унинг ўрнига ўтган мавсум якунларига кўра чемпионшипга йўл олган “Борнмут” посбони Аарон Рамздейл олиб келинди. 

“Вулверхэмптон” эса жамоадан кетган Доэрти ўрнини “Лион” ҳимоячиси Фернандо Марсал билан тўлдирди. “Порту”дан 18 ёшли Фабио Силва олиб келинди. Шу билан Нуну Эшпириту Санту жамоасида португалияликлар сони 11 тага етди. Турнинг иккинчи рақамли марказий баҳси мақомидаги ўйин 14 сентябрь соат 22:00 да бошланади.

вулвс

“Брайтон” - “Челси”

Премьер-лига ихлосмандлари учун энг қизиқ нарса - “Челси”нинг ўйинини кузатиш бўлиб турибди. Жамоа катта трансферларни амалга оширди. Роман Абрамович трансфер тақиқи туфайли оғир аҳволда қолиб кетган “аристократлар”ни Чемпионлар Лигасига олиб чиққан Фрэнк Лэмпардни муносиб тақдирлади. Ҳозирча, Ҳаким Зиеш, Тьягу Силва ва Бен Чилуэлл майдонга туша олмаслиги аниқ. Бу ҳақида бош мураббийнинг ўзи маълумот берди. 

“Брайтон” ҳам бир нечта ветеран футболчиларни таркибига қўшиб олди. Адам Лаллана ва Йоэль Вельтман етарлича катта тажрибага эга. Аарон Муй ва Дендонкер сингари футболчиларга рухсат берилди. 

Жамоаларнинг ўзаро учрашувлари атиги 14 тани ташкил этади. 11 тасида лондонликлар ва 1 тасида “чайкалар” ғалабага эришган. 2 та ўйин дуранг билан якунланган. 

Ушбу учрашувга 14 сентябрдан 15 сентябрга ўтар кечаси соат 00:15 да старт берилади.

челси

Турнинг мухлислар эътиборига сазовор беллашувлари ҳақида тўхталишга уриндик. Қолган 2 ўйинда “Кристал Пелас” - “Саутгемптон” ва “Вест Хэм” - Ньюкасл” баҳс олиб боради. “Бёрнли” - “Манчестер Юнайтед” ва “Ман Сити” - “Астон Вилла” учрашувлари ҳамшаҳар икки жамоанинг еврокубоклардаги иштироки сабаб кечиктирилди.

Абдулвосид Валихонов тайёрлади

Матнда хатолик топсангиз, ўша хатони белгилаб, бизга жўнатинг (Ctrl + Enter)