Аморим: "Брунуни алмаштириб бўлмайди, аммо ечим топамиз"

"Манчестер Юнайтед" бош мураббийи Рубен Аморим жамоа Бруну Фернандешсиз қандай ҳаракат қилиши ҳақидаги саволга жавоб берди.

Манкунианликлар сардори АПЛнинг 17-тури доирасида "Астон Вилла"га қарши ўйиннинг (1:2) биринчи таймида мушак жароҳатини олган эди. Илгари Бруну тахминан бир ой майдондан четда қолиши мумкинлиги хабар қилинган.

— Бизда бошқа футболчилар ҳам бор. Балки ўйинда турли вариантларни синаб кўришимиз керак бўлар. Менимча, Жек Флетчер ўзини жуда яхши кўрсатди. Шунинг учун бундай имкониятлар пайдо бўлганда, Жек каби футболчиларга ва бошқаларга ҳам ишониш керак. Биз ўйин учун ечим топамиз.

Брунуни тўлиқ алмаштириб бўлмайди, буни бугун эрталаб жамоага ҳам айтдим. Аммо агар бу вазиятдан қандайдир фойда чиқариш мумкин бўлса, шунга ҳаракат қилишимиз керак. Кўплаб футболчилар ўзини кўрсатиши лозим. Бу барча учун фаоллашиш ва ҳамма нарсани битта инсонга боғлаб қўймаслик кераклигини англаш учун яхши имконият.

Баъзи пайтларда биз ўйинни ташкил этиш ва вазиятлар яратишда унга таянамиз. Энди эса бу бошқа футболчилар учун ўзини намоён қилиш ва жамоага керак бўлган етакчилик фазилатларини кўрсатиш имконияти, — деди Аморим.