Аморим “Манчестер Юнайтед” ўйинчисининг ҳафсаласини пир қилди

“Манчестер Юнайтед” раҳбарияти жамоанинг қониқарсиз натижалари ортидан нидерландиялик бош мураббий Эрик тен Хаг ўрнига ноябрь ойида Рубен Аморимни олиб келди.

Португалиялик мутахассис жамоага келганидан кейин манчестерликларнинг энг истиқболли ўйинчиларидан ҳисобланган Алехандро Гарначонинг ишлари юришмай қолди.

Нафақат асосий таркиб, балки айрим учрашувларининг қайдномасига ҳам киритилмаётган 20 ёшли ҳужумкор футболчининг бош мураббий Аморимдан ҳафсаласи пир бўлган.

Transfer News Live ва Daily Express каби манбаларнинг маълум қилишича, Гарначо тезроқ жамоани тарк этмоқчи.

Transfermarkt портали томонидан 50 миллион еврога баҳоланаётган аргентиналик футболчи 2020 йили “Атлетико”дан Манчестерга келганидан бери асосий жамоада 115 та учрашув ўтказиб, 23 та гол ва 23 та ассист қайд этган эди.