“Ан-Наср” Роналдунинг футболкасидан кунига 300 та сотмоқда! Риёддаги клуб дўконида нималар бўляпти?

Бугун Саудия Арабистонидаги барча болакайларнинг орзуси битта – Криштиану Роналдунинг исми туширилган либос. Шу боис, “Ан-Наср”нинг расмий дўкони ҳар доимгидан-да кўпроқ эътибор марказида турибди. SPORTS.uz бу схема қандай ишлаётгани, дўкондаги нархларнинг ўзбек сўмида қанча эканлиги ва бошқа кўплаб қизиқарли маълумотларни тақдим этади.

Жамоанинг расмий дўкони Ар-Риёднинг шимолий қисмидан ўрин эгаллаган. Бу стадиондан 15-20 дақиқалик йўл. Унинг олдида улкан савдо маркази жойлашган бўлиб, асосан уй жиҳозлари билан тўла. Бу марказ рўпарасида эса, бизнинг нишондаги – “Ан-Наср”нинг асосий дўкони ўрин эгаллаган.

Пештахтада жамоанинг жорий мавсум учун танлаган 4 либоси ўрин эгаллаган. Барчасида Роналдунинг исми туширилган бўлиб, у келган мижозларни бир неча дақиқа давомида ўзига маҳлиё қилиб қўяди.

Айтишларига қараганда, Роналду келгач, клуб мухлисларнинг либос бўйича эҳтиёжини қондиришни уддалай олмаяпти. Янги келган футболкалар деярли 15-20 дақиқа ичида сотилмоқда.



“Тўғриси, қачон янги партия олиб келинишидан хабаримиз йўқ. Олиб келишган тақдирда ҳам, уларни дўконга жойлаштиришга улгурмай қоляпмиз. Мухлислар шунчаки 20-30 тадан харид қилмоқда. Охирги маротаба қачон уй либосимиз савдога қўйилганини эслай олмайман. Жерсийлар етишмаганидан, шортикларни алоҳида пуллашга мажбур бўляпмиз. Ҳатто, уларга бўлган талабни ҳам қаноатлантира олмаяпмиз. Дўконимизга кунига 300 дан ортиқ инсон ташриф буюради. Савдо ҳажми катталашиб бормоқда”,-деб вазиятга изоҳ беради дўкон консультанти.

Жамоанинг асосий либоси камдан кам сотувда бўлишига қарамай, учинчи ва тўртинчи либосларини топиш мумкин. Шуниндек, машғулотлар учун чиқарилган жерсийлар ҳам етарлича топилади.

Дўконнинг бошқа қисмида жамоа стадионининг кичик бир парчаси ўрнатилган. "Victory" компанияси томонидан ишлаб чиқарилган оддий футболкалар 298 минг сўм бўлса, “олимпика”лар учун 746 минг сўм тўлашингизга тўғри келади.

Бундан ташқари, “fan-shop”да сиз идишлар, соат ва телефон учун ғилофларни ҳам харид қилишингиз мумкин.

Нархлар борасида савол туғилиши табиий. Клуб рамзи туширилган термос – 447 минг сўм бўлса, оддий “кружка” учун 201 минг сўм тўлашингизга тўғри келади. Телефон ғилофлари учун 134 минг сўмдан воз кечасиз.

Болалар учун алоҳида совғалар ҳам мавжуд. Қалам, дафтар, футболка ва шунга ўхшаш предметлар етарлича топилади. Энг муҳими, “Ан-Наср” ўз дўконидаги нархларнинг халқбоп бўлиши учун ҳаракат қилади. Шу боис, ҳар қандай молиявий имкониятга эга инсон ўзи учун клубнинг бир бўлагини харид қилиш имкониятига эга.

Ассортимент катта бўлишига қарамай, келаётган мижозларнинг 99,9 фоизи Криштиану Роналду номи туширилган жерсийлардан бошқага қизиқмай қўйган. Ҳар куни 300 дан ортиқ либос сотаётган дўкон эгалари шунчаки талабга яраша таклиф беришга улгурмаяпти. Сўнгги ойлардаги буюртмаларнинг кўплигидан бошқа футболчилар исми туширилган либослар деярли дўкон пештахатларига чиқмаяпти.

Сотувчилар эса, тобора профессионаллашиб бормоқда. Айниқса, болалар либосни қўлга киритиши билан. Улар ўзлари харидорнинг телефонида видео тайёрлашга ёрдам беришади. Яъни, жерсийни харид қилган мижоз уни кияди ва Роналду сингари "Siuuuu", деганча голни нишонлайди. Буни эса, чаққон консультантлар ҳозиргина футболка харид қилган инсоннинг телефонига мухрлаб беради. Бу жараён шу қадар кўп такрорланганидан, дўкондагилар шунчаки "автомат" режимига ўтиб олган.

Ҳозир Ар-Риёд шаҳри аҳолиси учун Роналду чинакам кун мавзуси. Болалар, йигитлар ва қариялар ҳам айнан унинг исмини тилдан қўймаяпти. Футбол майдонида эса, нималар бўлаётганини тасаввур қилиш мушкул эмас.

Я . У Тайёрлади.