Ana xolos: Fayzullaev tanqidlar ostida qolib ketdi!
Rossiya Premer-ligasi jamoalari 2024 yildagi so‘nggi o‘yinlarini o‘tkazishdi. Endi qisqa tanaffus olib, futbolchilar kelasi yilning ilk kunlari maydonga qaytadi.
Premer-liganing o‘zbekistonlik legionerlari bor to‘rtta jamoasidan uchtasi yilni g‘alaba bilan yakunladi. Sensatsion natija Sankt-Peterburgda qayd etildi. Hamyurtimiz Sherzod Esonovning “Akron” jamoasi amaldagi chempion “Zenit”dan 2:1 hisobida ustun keldi. G‘alabali o‘yinda legionerimiz ishtirok etmadi. Umuman olganda, Esonov Rossiya chempionatida oltita bahsda qatnashdi xolos.
Umarali Rahmonaliev va Rustam Ashurmatovni o‘z sahifaga qo‘shib olgan “Rubin” safar o‘yinida kuchli iroda ko‘rsatdi. “Dinamo-Maxachqal’a” birinchi bo‘limning o‘zida mehmonlar darvozasini ikki bor ishg‘ol qildi. Biroq Rashid Rahimov shogirdlari o‘yinning qolgan vaqtida uchta gol urib, mag‘lubiyatga g‘alabaga aylantirdi. Har ikki legionerimiz zaxirada qoldirildi.
Joriy mavsumda Ashurmatov Premer-ligada sakkizta o‘yin o‘tkazgan bo‘lsa, Rahmonaliev ikki marta maydonga tushdi.
Bu yil “Ximki” safiga ko‘chib o‘tgan Alisher Odilov hali biror marotaba maydonga tushgani yo‘q. Uning jamoasi esa, Moskvada “Dinamo” mehmoni bo‘lib, yilni 1:4 hisobidagi mag‘lubiyat bilan yakunladi.
Premer-liganing 18-turida maydonga tushgan yagona legionerimiz Abbosbek Fayzullaev bo‘ldi. TsSKA Varonejda “Fakel” mehmoni bo‘lib kichik hisobdagi g‘alaba bilan qaytdi. 21 yoshli legionerimiz 87-daqiqa to‘p tepdi.
Fayzullaev harchand harakat qilmasin, raqib darvozasini ishg‘ol qila olmadi, jamoadoshlariga golli pas ham uzatgani yo‘q. Tur o‘yinlarini tahlil qilgan ekspertlar hamyurtimizning harakatlarini quyidagicha baholadi.
Xususan, euro-football.ru portali ekspertlari Fayzullaevning “Fakel”ga qarshi o‘yinini 10 balldan 4,5 ga loyiq ko‘rdi.
- Abbosbek Fayzullaev qishga kelib toliqib qoldi. 21 yoshli futbolchi faqat birgina o‘tkir hujumda qatnashdi xolos. Abbos 19 marta to‘p yo‘qotdi, to‘qqiz marta yakkakurashlarga kirishib, ettitasida mag‘lub bo‘ldi. Bir marta golli vaziyatni barbol qildi. Jamoadoshlari Fayzullaevni uch marotaba yakuniy zarba beradigan vaziyatga olib chiqdi, ularning birortasi samarali bo‘lgani yo‘q, - deb yozdi euro-football.ru portali.
O‘yinga baho bergan futbol eksperti, TsSKAning sobiq futbolchisi Vladimir Ponomaryov ham Fayzullaevning o‘yiniga tanqidiy munosabat bildirdi.
- TsSKA hujum chizig‘i umuman samara bermayapti, keyingi paytda faqat himoyachilar gol urmoqda. Bu bosh murabbiyning muammosi va aynan u bu masalaga munosib echim topishi kerak.
Golsiz ochko jamg‘arib bo‘lmaydi. Abbosbek Fayzullaev ham keskinlikni yo‘qotib qo‘ydi. Raqib darvozasi oldida aynan Abbos ko‘proq xavf tug‘dirishi kerak, - dedi Vladimir Ponomaryov.
Abbosbek Fayzullaev joriy mavsumda Premer-ligada 16 ta uchrashuvda ishtirok etib, ikkita gol va uchta assist muallifi bo‘ldi. Shuningdek, legionerimiz Rossiya kubogida ettita bellashuvda bitta gol urib, jamoadoshlariga uchta golli pas uzatdi. TsSKA kubok musobaqasida yarim finalga yo‘llanma olgan va bosh sovrin uchun kurashni davom ettirmoqda.
Superklub Husanov transferini uddalashni mashhur agentga yukladi
Husanovning muxlislariga yoqadigan xabar!
Fikrlar