Ана холос: Франциялик боксчилар жаҳон чемпионатини ўтказиб юборади

Ливерпулда ўтказилаётган аёллар ўртасидаги бокс бўйича жаҳон чемпионатида Франция терма жамоаси иштирок эта олмайди.

Сабаб: спортчилар мусобақага қўйилиши учун аёл жинсини тасдиқловчи гендер тестларини топшириши керак эди. Бироқ Францияда бундай тестлар қонун билан тақиқланган.

Август бошида Франция Спорт вазирлиги федерацияни огоҳлантириб, гендер тестлари на тиббий мақсадларда, на илмий изланишлар ёки допингга қарши кураш учун ишлатилмаслигини таъкидлади.

Шу боис World Boxing француз спортчиларини бошқа мамлакат вакиллари билан бирга Англиянинг Лидс шаҳридаги аккредитацияланган лабораторияга юборди. Лекин лаборатория натижаларни белгиланган муддатда етказиб бера олмади.

Натижада, "FF Boxe" расмий баёнот бериб, француз боксчилари Ливерпулдаги жаҳон чемпионатини ўтказиб юборишини маълум қилди.