Ана холос: “Реал” янги мураббий билан келишиб қўйди, у ёзда келади...

“Реал” раҳбарияти Карло Анчелоттининг бош мураббийлик курсисини қайси мутахассисга топшириш масаласини ҳал қилиб қўйди.

Испаниянинг нуфузли манбаси – fichajes.net сайтининг хабар беришича, Мадридга Хаби Алонсо келади. Томонлар ўзаро ҳамкорлик бўйича музокара ўтказиб, келишувга эришгани айтилмоқда.

Испаниялик мутахассис ўзига қадрдон бўлган “Реал”ни кейинги мавсум олдидан бошқарадиган бўляпти.   

“Қироллик клуби” президенти Флорентино Перес Хаби Алонсонинг “Байер”даги фаолиятини ўрганиб чиқиб, “Реал”нинг янги лойиҳасида айнан уни бош қилиш ғоясини қўллаб-қувватлади.

Мадридликларга Алонсо қўллаётган ҳужумкор ўйин тактикаси жуда маъқул келмоқда. Шунингдек, бу мутахассис футболчилар билан тил топишишда ҳам ижобий кўрсаткичларга эга.

Хаби Алонсога Европанинг бошқа грандларидан ҳам таклифлар етарли. Бироқ у футболчилар даврида айнан “Реал”да ўйнагани танловга таъсир қилган кўринади.

Инсайдерларнинг маълумотларига қараганда, “Реал” дастлаб Алонсога икки йиллик шартнома беради. Агар ҳамкорлик юқори даражада давом этса, мадридликлар келишув шартлари ва муддатларини ўзгартиради.