Anchelotti va Sarri eplolmagandi, Gattuzo uddasidan chiqdi

Italiya kubogining finalida "Napoli" klubi "Yuventus" (0:0, penaltilar seriyasida 4:2) ustidan qiyin g‘alabaga erishdi.

Ushbu kubok 2019 yilning dekabr oyida Karlo Anchelotti o‘rnini egallagan Jennaro Gattuzoning murabbiylik faoliyatidagi ilk sovrin bo‘ldi.

42 yoshli mutaxassis bungacha "Son", "Palermo", OFI, "Piza" va "Milan" klublarini boshqargan.

"Napoli" jamoasi esa 2014 yildan beri sovrin yutmagandi. Neapol klubi so‘nggi bor, Rafael Benites boshqaruvida kubok va Superkubok g‘olibligini qo‘lga kiritgan.

Anchelotti va Maurisio Sarri "Napoli"ni boshqarib, hech qaysi turnirda chempion bo‘lmagan.