"Андижон" Анталиядаги иккинчи ўйинини ўтказади. Рақибни эса биласиз...

“Андижон” клуби Анталия йиғини доирасидаги ўзининг иккинчи учрашувини Украинанинг “Ворскла” жамоасига қарши ўтказади. Бу ном мухлисларимиз учун бегона эмас. Ҳарқалай озми-кўпми мазкур клуб ҳақида эшитишган. Айтиш лозимки, Украина футболида ўз ўрнига ва тарихига эга бўлган клуб саналади. Биз бу сафар мазкур бўлажак рақиб ҳақида тўхталиб ўтамиз.

Полтава шаҳри шарафини ҳимоя қилувчи “Ворскла” 1955 йилнинг 5 январь санасида ташкил топган. Демак, бу йил ушбу жамоа ташкил этилганига 70 йил тўлди.

“Ворскла” Украина премьер-лигаси иштирокчиси саналади. Айни пайтда клуб 16 та иштирокчи орасида 17 та ўйинда 4 ғалаба, 4 дуранг ва 9 мағлубият қайд этиб, тўплар нисбати 15\25 кўринишида бўлиб, 16 очко билан 12-ўринни банд этиб турибди.

Жамоа ҳозирда мавсумнинг иккинчи қисмига тайёрланмоқда. “Ворскла” чемпионатнинг навбатдаги ўйинини 22 февраль куни 18-тур доирасида сафарда “Оболонь”га қарши ўтказади.

“Трансфермакрт”даги маълумотга таянадиган бўлсак, клубнинг энг қиммат футболчиси украиналик ярим ҳимоячи Илья Крупский бўлиб, 21 ёшли футболчининг нархи 1 миллион еврони ташкил қилади. Шунингдек, Мали, Косово, Нигериядан келган легионерлари бор. Айни пайтда Анталия йиғини давомида ҳам клуб сафида бир қатор янги ўйинчилар қатнашишяпти.

2024 йилнинг  24 октябрь куни “Ворскла”га Юрий Максимов бош мураббий этиб тайинланган. 56 ёшли украиналик мутахассис бошчилигида “Ворскла” ҳозирга қадар Украина премьер-лигаси, УЕФА Лига Конференцияси ва Украина Кубогида ҳаммаси бўлиб 10 та ўйин ўтказган. Шундан 2 тасида ғалаба, 1 дуранг ва 7 мағлубият қайд этилган.

“Ворскла” эришган ютуқлар ҳам бор. Жумладан, икки марта Украина бронзасини қўлга киритган. Бир марта Украина Кубогини ютган ва яна икки марта финалда ўйнаган.

Клуб Европа лигасида 6 йил илгари “Арсенал”, “Спортинг” каби клубларга қарши майдонга тушган. Ўшанда ушбу жамоалар билан “Е” гуруҳида иштирок этган.

“Ворскла” уй ўйинларини “Олексей Бутовский” номли стадионида ўтказади. 1951 йилда қуриб битказилган арена ўз бағрига 23842 нафар мухлисни сиғдира олади.

“Андижон” – “Ворскла” қарама-қаршилиги 29 январь куни Анталиядаги “Титаник” номли стадионида маҳаллий вақт билан соат 16:00 да бошланади. Тошкент вақтига эса 18:00 га тўғри келади.