"Андижон" бош мураббийликка яна бир номзодни кўриб чиқмоқда. Сиз уни яхши танийсиз!

“Андижон” жамоасининг бош мураббийи сифатида ишлаб келган Виктор Кумиков кеча расман истеъфога чиқарилганидан хабардорсиз. Машғулотларни эса вақтинча Бахтиёр Ҳамидуллаев ўтказиб турибди.

Бош мураббий бўлиш учун эса албатта “ПРО” лицензияси бўлиши шарт. Ҳамидуллаевда эса бундай лицензия йўқ. Аммо ҳар қандай ҳолатда ҳам, у мураббийлар штабида ишини давом эттиради. Шунинг учун “Андижон” раҳбарияти бошқа мутахассислар билан музокараларга киришган.

Кеча Даврон Файзиев бош мураббийликка номзодлар орасида борлиги ҳақида маълум қилгандик. Бундан ташқари, раҳбарият яна бир номзодни ҳам кўриб чиқмоқда. Бу сиз учун яхши таниш бўлган Александр Хомяковдир.

У жамоани ушбу мавсумга ўзи тайёрлаган ва 3-турдан кейин клубдан кетишга қарор қилганди. Янги раҳбарият эса Александр Андреевични яна ортга қайтариш устида ҳам ўйламоқда. Айни пайтда эса, у “Бухоро” клубида маслаҳатчи мураббий сифатида фаолият олиб боряпти.

Хуллас, маълумотларга қараганда, “Андижон”ни Файзиев ёки Хомяковдан бири бошқариши кутилмоқда. Воқеалар ривожини эса кузатишда давом этамиз.