"Андижон" бугун Анталияда навбатдаги ўйинда майдонга тушади. Рақиб эса...

Аниқ режа асосида Анталияда ўқув-машғулот йиғинларини олиб бораётган “Андижон” жамоаси мазкур тайёргарлик доирасида навбатдаги ўртоқлик учрашувига ҳам етиб келди. "Бургутлар"нинг бу сафарги спарриинг-рақиби - Қозоғистоннинг “Каспий Актау” жамоаси.

Ушбу клуб ўтган йили Қозоғистон биринчи дивизионида биринчи ўринни эгаллаб Қозоғистон премьер-лигасига йўлланмани қўлга киритди. Клуб 1979 йилнинг 1 январида ташкил топган. Жамоага 42 ёшли маҳаллий мутахассис Пиралий Алиев бош мураббийлик қилмоқда. У ушбу лавозимга шу йилнинг 21 январь куни тайинланди. Шунингдек, 4 кун муқаддам “Каспий Актау” жамоаси португалиялик ҳимоячи Андре Амарал билан ҳам шартнома имзолади.

Ёдингизда бўлса, "Андижон" клуби бунга қадар Туркияда учта ўртоқлик ўйинини ўтказди. Аввалига дастлаб баҳсда Туркиянинг "Сиверей Беледийеспор" клуби 3:0 ҳисобида таслим этилди. Иккинчи баҳсда Венгриянинг "Вашаш" жамоасига 0:4 ҳисобида имконият бой берилган бўлса, учинчи назорат учрашувида Македония чемпиони "Вардар" билан 1:1 ҳисобида дуранг ўйналди. 

Умумий ҳисобда Самвел Бабаян жамоаси Анталия йиғини давомида 10 та ўртоқлик ўйинида майдонга тушиши кўзда тутилган. Шунга яраша Туркиядаги йиғин ҳам уч босқичда бўлиб ўтиши режалаштирилган. Ортда қолган учта ўйин айнан биринчи йиғин доирасида ўтказилди. "Андижон"нинг Анталиядаги иккинчи тайёргарлик босқичида ҳам учта ўртоқлик учрашуви ташкил этилиши белгиланган ва "Каспий Актау"га қарши баҳс иккинчи босқич йиғинидаги илк баҳсга, умумий ҳисобда эса тўртинчи назорат учрашувига айланади. 

“Андижон” - “Каспий Актау” ўртасидаги беллашув 29 январь куни Тошкент вақти билан 19:45 да бошланади.