"Андижон" жамоаси янги мавсум олдидан мухлислар билан учрашди. Тадбирда қатнашган вилоят ҳокими клуб ҳақида нималарни айтди?

2023 йилги футбол мавсуми бошланиши олдидан аксарият клубларда мухлислар билан учрашувлар ва тақдимот маросимларини ўтказиш одат тусига кирган. Суперлигага қайтган “Андижон” жамоаси 27 февраль куни ўз мухлислари билан учрашди. “Ёшлар маркази”да ўтказилган ўзига хос тақдимот маросимида Андижон вилояти ҳокими Шуҳратбек Абдураҳмонов ҳам бевосита иштирок этди.

“Ҳурматли футбол ишқибозлари, қадрли футболчилар, ҳаммаларингни янги футбол мавсуми бошланаётгани билан шахсан ўзим ва Андижон халқи номидан самимий табриклайман, - дея гап бошлади, Шуҳратбек Қўшоқбоевич. - Яна ҳокимият футбол бўйича ҳамма нарсани ўз бўйнига олди. Худо хоҳласа, тез орада катта қарор чиқади. “GM Uzbekistan” билан ҳокимият жамоани биргаликда қиламиз. Насиб бўлса, бу йил молиявий томондан ҳеч қанақа муаммо бўлмайди.

Фақат битта нарса: натижа ҳам бўлиши керак-да! Палон жамоаларда бундай экан, ундай экан дейсизлар, аммо уларда натижа бор-да, бизда ҳам натижалар бўлса, мен ҳаммасини муҳайё қилишга тайёрман. Айнан клуб раҳбарлари, мураббийлари ва футболчилари билан учрашиш учун вилоят раҳбари сифатида келдим. Ҳамма нарсани ҳал қилганмиз, қарздорликларни ҳам. Ҳаттоки формаларини ҳам хориждан олиб келдик. Стадионда ҳам ишлар давом этяпти. Ўзбекистондаги энг зўр майдон чимини тайёрлайдиган усталар билан шартнома тузганмиз. Прожекторини ҳам тайёрлашади. Буларни сизлар билан маслаҳатлашиб қиляпмиз. Натижа қилинглар, биз ҳам натижа қиламиз. Яна бир бор барчангизни бошланаётган янги футбол мавсуми билан табриклайман. Юртимиз тинч, Юртбошимиз омон бўлсин. Доим омад ҳамиша бирга бўлсин”, - дейди вилоят ҳокими.

Шундан сўнг вилоят ҳокими футболчиларга рақамлари туширилган футболкаларни топширди. Аввалига шартномаси узайтирилган ўйинчилар саҳнага таклиф қилинди. Унга кўра, Элдор Адҳамов 1, Моҳир Комилов 12, Абдувоҳид Ғуломов 5, Абдураҳмон Комилов 14, Владимир Бубанья 15, Илдар Маматказин 21, Ислом Маматказин 28, Илҳом Алижонов 66, Асилбек Айсаров 6, Илҳом Абдуғаниев 10, Фарҳод Соҳибжонов 17, Суҳроб Бердиев 19, Муҳаммадкарим Тоиров 26, Шаҳбоз Эркинов 22, Иззат Абдулхақов 77 рақамларни қабул қилиб олдилар.

Кейин янги мавсум олдидан клубга янги таклиф қилинган ҳамда шартнома имзоланган ўйинчилар бирма-бир саҳнага таклиф қилиниб, вилоят ҳокимидан ўз футболкаларини қабул қилиб олдилар. Демак, Игорь Литовка 72, Дилшод Комилов 4, Ахтам Назаров 91, Фарҳод Бекмуродов 8, Леван Арвеладзе 9, Сардор Абдунабиев 11, Сардор Азимов 13, Нодари Кавтарадзе 88, Бобур Фарҳодов 7 ва Рубин Хебайга 99-рақамли футболка топширилди.

Хабарингиз бўлса, куни кеча Андижон вилояти “Ҳокими Кубоги” мусобақасида “Андижон” ўринбосарлар жамоаси ғолиб чиққанди. Вилоят ҳокими Шуҳратбек Абдураҳмонов уларга махсус Кубокни тантанали равишда топширди.

Шунингдек, “Андижон” клуби бош директори Улуғбек Мирзаев ва бош мураббий Александр Хомяков вилоят ҳокимига 10-рақамли футболкани эсдалик совғаси сифатида топширдилар.

Бундан ташқари, жамоа бош мураббийи сўзга чиқиб, бундан эътибор учун миннатдорчилик билдириб, юқори ўринлар учун курашишга ва ғалабалар қозонишга максимал даражада бор кучини сарфлашини айтиб ўтди.

Клуб бош директори Улуғбек Мирзаев эса шундай деди: “2023 йилги футбол мавсуми олдидан кўришиб турганмиздан хурсандмиз. Шу кунгача катта ҳажмдаги ишлар қилинди, деб ўйлайман. Жамоамиз таркиби жуда яхши шакллантирилди. Мураббийлар штаби, янги футболчилар ва иқтидорли ёшлар жалб қилинди. Андижон вилоятида турли ёшдаги терма жамоаларга номзодлар сони ортиб боряпти. Бу жараён яна узоқ давом этади.

Яқин йилларда бир қатор истеъдодли ёшларимиз хориж клубларида тўп сурадилар ва шу томонлама ҳам жамоамиз даромад қилиш режаси бор. Вилоятимиз раҳбари ҳам натижани алоҳида айтиб ўтди. Мухлисларимиз ҳам узоқ йиллардан бери кутмоқдалар. Буни барчамиз ҳис қилиб турибмиз. “Андижон” жамоасини Суперлигада яхши жамоа сифатида юқори ўринларга кўтарилиши учун бор кучимизни сарфлаймиз. Бу йилги биз учун ўтиш йили бўлса, кейинги йили “Андижон” клуби ўзининг 60 ёшини нишонлайди. Юбилейи учун албатта совриндор ўринлардан бирини эгаллашга, Ўзбекистон Кубоги ва Осиё Чемпионлар лигасига йўлланма олишга қаттиқ ҳаракат қиламиз. Бундай фан-клуби бор жамоага фақат юқори ўринлар ярашади”.

Бош директордан кейин сўз навбати ашаддий ишқибоз, “Андижон” фан-клуби раиси Нодирбек Тўйчиевга берилди: “Барчага ассалому алайкум. Қийинчилик билан бўлган иш яхши бўлади. Жамоамиз яхши, мухлисларга куч-қувват, жамоамизга ишонамиз. Битта гап: ушбу ҳокимимиз даврида ҳеч бўлмаганда 4-ўринни олайлик. Энг яхши натижамиз 5-ўрин, 2008 йилда олганмиз. Футболчиларимиз ютқазадиган йигитлар эмас!”.

Шундан кейин “Андижон” клуби бош директори Улуғбек Мирзаев янги мавсумда фан-клуб учун бир-биридан ажойиб футболкалар, атрибутика, барабанлар, пананка ва яна бошқа турли буюмлар олиб келинаётганини айтди ва уларнинг бир қисмини мухлисларга намойиш қилди. Фан-клуб аъзолари учун ҳам асосий жамоанинг либоси билан бир хил кўринишда қизил рангли лисоблар тайёрланди. Барча маҳсулотларга Туркияда буюртма берилган. Шунингдек, Улуғбек Мирзаев бу йил жамоа Jako фирмасида тайёрланган экипировкалардан фойдаланишини маълум қилди. Бундан ташқари, жамоанинг уй ва сафардаги формаларини намойиш қилди. Унга кўра, қизил рангли форма жамоанинг уй либоси сифатида айтилди. Унда ўзига хослик мавжуд бўлиб, шаҳар кўриниши спутник орқали акс этган ва унда стадион тасвири туширилган. Қизиғи, стадиони форманинг юрак қисмида жойлашган бўлиб, ҳар бир футболчи клуб юрагимда, деган рамзий маънони ҳис қилиш учун ёрдам беради. Оқ рангли либосда бургутлар тасвири туширилган. Қолаверса, Нафақат асосий жамоа учун, балки ўринбосарлар ҳам Jako эпикировкалари билан таъминланди.       

Бир сўз билан айтганда, “Андижон” клубининг мавсум бошланиши олдидан ишқибозлари билан учрашув жуда кўтаринки кайфиятда ўтди.