"Андижон" клубига вақтинчалик бош мураббий тайинланди

Бугун “Андижон” клуби қароргоҳида раҳбарият ва жамоа аъзолари ўртасида кун тартибидаги масала юзасидан йиғилиш бўлиб ўтди.

Клуб матбуот хизматининг маълум қилишича, маҳаллий мутахассис Ислом Аҳмедов вақтинча бош мураббий лавозимига тайинланди. Бунгача у мураббийлар штабида фаолият кўрсатиб келаётганди.

Маълумот учун, Ислом Аҳмедов 1986 йилнинг 8 июль санасида таваллуд топган. Андижон футболи тарбияланувчиси ҳисобланади. Футболчи сифатида “УзДонгЖу”, “Динамо” (Самарқанд), “Сўғдиёна” ва албатта “Андижон” шарафини ҳимоя қилган.

Мураббий сифатида Андижон футбол академиясида кўп йиллар давомида самарали иш олиб борган.

Шунингдек, мураббийлар штабида Аҳмедовга Сергей Арслонов яқиндан ёрдам беради. У 1986 йилнинг 6 ноябрь санасида таваллуд топган бўлиб, ўйинчилик фаолиятини “Машъал”, “Шўртан”, “УзДонгЖу” сингари клубларда ўтказган. Қолаверса, “Пахаткор”, “Кубань” (Россия) ва “Динамо” (Киев, Украина) академияларида таҳсил олган. мураббий сифатида Қирғизистоннинг "Дордой” клубини бошқарган. Шунингдек, юртимизда “Сурхон”, “Нефтчи” ҳамда “Сўғдиёна” жамоаларида фаолият олиб борган. Эндиликда эса “Андижон”да катта мураббий лавозимида ишлайди.

Бундан ташқари, дарвозабонлар мураббийи сифатида бунгача U21 жамоасида меҳнат қилиб келаётган Бекзод Турғунов иш олиб боради.