"Андижон" Суҳроб Бердиев билан шартнома имзолади

Яқинда "Андижон" жамоаси сафига тажрибали футболчи Суҳроб Бердиев қўшилгани тўғрисида хабар бериб ўтгандик.

Клуб ва футболчи ўзаро келишувга эришди. Шу боис Суҳроб Бердиев билан шартнома имзоланганини маълум қиламиз. Эндиликда ушбу ўйинчи жамоамиз аъзосига айланди, - дея хабар бермоқда клуб матбуот хизмати.

Суҳроб Бердиев ҳақида маълумот берадиган бўлсак, у 1990 йил 12 апрель санасида Тошкент шаҳрида таваллуд топган.

Профессионал фаолиятини 2006 йили “Локомотив” клубида бошлаган. 2010 йилда “Олмалиқ” жамоасига кўчиб ўтади. У ерда бир неча мавсум фаолият кўрсатгач, 2013 йили “Сўғдиёна” аъзосига айланади. Жиззахда икки йил тўп сурган футболчи 2015 йилда “Шўртан”га кўчиб ўтди. Бир йилдан кейин эса “Пахтакор” аъзосига айланди. У ерда бир давра тўп сургач, 2016 йилнинг иккинчи даврасидан “Қўқон-1912” жамоасига ўтган ҳолда ушбу клубда 2021 йилгача тўп сурди. Жорий мавсумнинг биринчи даврасини эса “Янгиер” клубида ўтказди.

Кўриб турганингиздек, Суҳроб Бердиев энди "Андижон" аъзосига айланди.