"Андижон"даги ишимни ўзим баҳолай олмайман" ёхуд Виктор Кумиков янги клубига Ўзбекистондан футболчиларни жалб қилмоқчими?

Россиялик тажрибали мураббий Виктор Кумиковнинг “Андижон”даги фаолияти якунланди. Эндиликда у Қозоғистоннинг “Қайсар” клуби устози сифатида ишга киришди. Кумиков Sports.uz сайти учун бироз вақт ажратди.

- Виктор Балютович, бош мураббий сифатида “Қайсар” клубида иш бошлаганингиз билан табриклаймиз. Шартнома муддати қанча?

- Табрик учун раҳмат! Клуб билан тузган шартномам 2023 йилги мавсум охиригача.

- Жамоангиз билан ҳозир Туркия йиғинидамисиз?

- Ҳа, бу йиғинда “Сампдория” ва “Самсунспор”га қарши иккита назорат учрашувини ўтказиш режалаштирилган.

кумиков4_1

- “Андижон”га нисбатан “Қайсар” клубида ишлашнинг сиз учун қандай қизиқарли жиҳатлари бор?

- Ҳамма ерда ишлаш қизиқарли. Бу ерда гап бунда эмас. Гап шундаки, қаерда ишламанг, клуб структураси фаолият кўрсатмоғи даркор. Шуғулланиш учун инвентарлар етарли даражада бўлиши керак. Бундан ташқари, алдовсиз хизмат ҳақингизни доим, вақтида тўлашлари керак. Бу ерда юқорида санаб ўтганларимнинг барчаси бор.

- Умуман олганда, “Андижон” жамоасида олиб борган фаолиятингиздан қониққан бўлсангиз керак-а? Ҳар ҳолда жамоани Суперлигага олиб чиқдингиз ва про лиганинг энг яхши мураббийи бўлдингиз.

- “Андижон”даги ишимни ўзим баҳолай олмайман. Натижа қайд этилди. Буни раҳбарият, жамоатчилик ва мухлислар баҳолашлари даркор ва ҳоказо...

вк_2

- “Қайсар” жамоасига Ўзбекистондан футболчилар таклиф қилиш режангиз ҳам борми?

- Ҳозирча бирор янги ўйинчини кўз остимизга олганимиз йўқ. Ўзимизда борларини назоратдан ўтказяпмиз. Балки иккинчи йиғинда таркибга кимнидир ёки кимларнидир қўшиб олишимиз мумкин.

- Янги клубда олдингизга қўйилган вазифа қандай?

- Олдимизга қўйилган вазифа Қозоғистон премъер-лигаси ва мамлакат Кубоги мусобақаларида муносиб иштирок этишдир.

кумиков44

- “Қайсар”да яратилган шарт-шароитлар қониқарлими?

- “Қайсар”да ишлаш учун жуда қулай инфратузилма мавжуд. Бундан ташқари. клуб уй ўйинларини ўтказадиган стадион ҳам қайтадан таъмирланган. 2023 йил клуб учун яна бир майдон қуриб беришларини ваъда қилишган! Энг асосийси, бу ерда клуб бор. Мутасаддилар ҳар қандай кундалик масалани ўрнида ечиб беришга тайёрлар.

- Биламизки, Қарағанданинг “Шахтёр” жамоасида қатор муваффақиятларга эришгансиз. “Қайсар”да ҳам шуларни такрорлай оласизми?

- Биз ўзимиздан талаб қилинган нарсани амалга ошириб, натижа кўрсатишга интиламиз.

кумиков2

- Собиқ клубингиз – “Андижон” ва унинг мухлисларига нима деган бўлардингиз?

- “Андижон”га янги мавсумда омад ёр бўлишини тилайман. Клубнинг жонкуяр мухлисларига менинг катта саломимни етказиб қўйинг!

Шуҳратбек Жўраев.

 

Фикрлар

Фикр қолдириш учун авторизациядан ўтинг!