Андрей Канчельскис: “Қозоғистонда ҳам барчаси Ўзбекистондаги каби” (Интервью)

“Манчестер Юнайтед” собиқ футболчиси Андрей Канчельскис Қозоғистонинг “Тобол” клуби бош директори лавозимида иш бошлаганидан хабарингиз бор. “Навбаҳор” собиқ устози янги иш ўрни ва “Тобол”даги режалари борасида маҳаллий нашрга кичик интервью берди. Унда футбол мутахассиси “Тобол”га футболни қайтармоқчи эканлигини яшириб ўтиргани йўқ.

“Конференциялар Лигаси” доирасида “Тобол”ни “Хонки”га қарши баҳс кутиб турибди. Бу ўйиндан нималар кутяпсиз?

- Албатта, финларни енгишни истаймиз. Кейинги босқичга ўтсак, “Базел” билан тўқнаш келамиз. Барча билан тўп тепишга тайёр бўлиш лозим. Рақибнинг ким бўлишининг умуман фарқи йўқ. Мана ҳозиргина Атирау шаҳридан келдик. Жуда оғир ўтган баҳсда Қозоғистон кубоги финалига йўл олдик.

Қандайдир янги номларни клубга таклиф этиш режангизда борми?

- Барча йўналишларда иш давом этмоқда. Аллақачон беларуслик Павель Забелиннинг трансферини ҳал қилдик. Ҳозир клубимиз мураббийлар штаби билан биргаликда иш олиб боряпмиз. Қайзи зоналарни кучайтиришимиз лозимлиги борасида тасаввурга эгамиз, аммо футболчиларни мураббийлар штаби танлайди.

Машғулот жараёнларида иштирок этишни режалаштиряпсизми?

- Йўқ. Бу ишни бажариш вазифасини бўйнига олган мураббийлар штаби мавжуд. Бундан бошқа ишларим ҳам кўп. Эътиборимни талаб этадиган бошқа юмушлар етарлича. Масалан, болалар футболи.

Қозоғистон сизга ёқдими?

- Барчаси менга қулай. Худди Ўзбекистонда бўлгани каби. Энди ишлашимиз лозим. Мураббийлик лавозими бўлмасада, бор кучим билан жамоага наф келтириш учун ҳаракат қиламан. Асосийси, футболга қайтдим. Энди тўхтаб қолиш йўқ.