Англия чемпионлиги энди “Манчестер Сити”нинг қўлида

Англия Премьер-лигасида пешқадамлик қилаётган “Арсенал” 31-турнинг кўчирилган учрашувида чемпионат аутсайдери “Вулверхэмптон” меҳмони бўлиб, қимматли икки очкони йўқотди.

Микель Артета шогирдлари бир соат давомида иккита гол фарқи билан ҳисобда олдинда борган бўлса-да, қолган дақиқаларда “бўрилар” вазиятни тенглаштиришни уддалади – 2:2.

Англиялик собиқ футболчи Алан Смит “канонирлар”нинг ўйиндаги омадсизлигига муносабат билдирди.

- Чемпионат бурилиш нуқтасига етиб келди. Энди ҳаммаси “Манчестер Сити” қўлида. Премьер-лигада аутсайдерга қарши икки гол фарқи билан ютиб туриб, ғалабани бой бериш мумкин эмас.

Бу “канонирлар” учун қабул қилиб бўлмайдиган ҳолат. Кўпчилик “Арсенал”ни жаҳоннинг энг яхши жамоаси дейди ва ҳақиқатан ҳам уларнинг таркиби жуда кучли.

Бироқ сизда совуққонлик ва натижага эришиш қобилияти бўлмаса, бошқа устунликларнинг умуман аҳамияти йўқ”, - деди Алан Смит.

Айни пайтда “Манчестер Сити” битта ўйин кам ўтказган ҳолда “Арсенал”дан беш очкога ортда қолмоқда. Хосеп Гвардиола жамоаси мавсум охиригача очколар ўртасидаги фарқни йўққа чиқариш имконияти эга. Зотан, “Арсенал” аввалги йилларда ҳам бир неча маротаба мусобақа жадвалида пешқадамлик қилиб, мавсумнинг ҳал қилувчи палласида “Манчестер Сити” ёки “Ливерпуль”ни чемпионлик тахтига ўтказиб юборган ҳолатлар кузатилган.