Англия грандлари “Барса”дан кетган футболчини Европага қайтармоқчи

2024 йилнинг бошида “Барселона”га катта умидлар билан келиб, бир йилда Бразилияга қайтиб кетган универсал ҳужумчи Витор Рокени яна Европага таклиф этишмоқда.

Бразилиянинг “Крузейро” ва “Атлетико Паранаэнсе” жамоаларидаги фаолиятидан кейин “Барселона”га олиб келинган Витор Рокенинг Европада футболида ўзини кўрсатишга бўлган биринчи уриниши муваффақиятсиз чиқди.

Каталонияликлар асосий таркибга кира олмаган ёш ўйинчини “Бетис”га ижарага берди. 2025 йилнинг февралида эса, уни “Палмейрас”га сотиб юборди.

Ёш бразилиялик ўйинчи ватанига қайтганидан сўнг, карьерасини қайта жонлантирди. Журналист Экрем Конурнинг маълумот беришича, 20 ёшли футболчининг ўйинларини Лондоннинг “Челси” ва “Тоттенхэм” клублари диққат билан кузатмоқда.

Шунингдек,  Италиянинг “Наполи” ва “Рома”, Испаниянинг “Бетис” каби жамоалари ҳам Виктор Рокега ўз сафидан жой беришга тайёрлиги айтилмоқда.

Витор Роке “Палмейрас”га ўтганидан кейин янги жамоаси сафида барча мусобақаларда 48 та ўйин ўтказиб, 17 та гол уриб ва  4 та ассист муаллифи бўлди. Transfermarkt портали унинг бозор қийматини 20 миллион еврога баҳолаган.