Анвар Бердиев: "Жамоамнинг потенциали бундан ҳам юқори"

Про лиганинг 27-турида “Шўртан” ўз майдонида “Олимпик Мобиуз”ни 1:0 ҳисобида мағлубиятга учратди ва 4-ўринни банд қилган ҳолда Суперлигага йўл олиш учун плей-офф йўлланмасини қўлга киритди. Ўйиндан кейин “Шўртан” устози Анвар Бердиев ўз фикрлари билан ўртоқлашди.

-  Жуда қийин учрашувда ғалаба қозондик. Биламиз, “Олимпик Мобиуз” ҳам шаклланган жамоа. Асосан ёшлар терма жамоаси ҳисобланади. Чиройли ўйин кўрсатишди. Олдин ҳам айтганман, ҳозир ҳам айтаман: про лигада ўткинчи ўйинлар йўқ. Худога шукр, олдимизга қўйилган асосий вазифалардан бирини бажара олдик. Энди кейинги учрашувга тайёргарликни бошлаймиз. Жамоамиз мухлислари чин кўнгилдан ишқибозлик қилишди, уларга алоҳида миннатдорчилик билдираман.

- Жамоа йил бошида олдига қўйилган мақсадларга қайсидир маънода эришдими ёки яна бироз потенциали юқори бўлиши мумкинми?

- Жамоамиз потенциалини бемалол юқори деб айта оламан. Лекин бир қатор ўйинларда очколарни йўқотдик. Жамоамни бундан ҳам юқорисига лойиқ, деб ўйлайман. Ҳали ҳаммаси олдинда. Биз олдимизга қўйилган вазифани ҳозирча озроғини бажардик, холос. Ҳали бизни олдинда кутаётган учрашувлар бор. Озгина имкон бўлса ҳам вазифани бажаришга охиригача ҳаракат қиламиз.