Анвар Бердиев: "Насаф"да бошқа мақсад бор, бизда эса бошқа мақсад"

“Шўртан” клуби “Насаф” майдонида номинал мезбон сифатида айнан майдон эгасига қарши тўп сурди. Голларга бой ўтган учрашувда “Насаф” 1:4 ҳисобида ғолиб чиқди. Ўйиндан кейин “Шўртан” бош мураббийи Анвар Бердиев матбуот анжуманида саволларга жавоб қайтарди.

- Ўзбекистонни энг кучли жамоасига қарши тўп сурдик. “Насаф” жамоасини ғалаба билан табриклаймиз.

- “Шўртан”ни олдига қўйилган вазифаси қандай?

- Вазифа – ҳар бир ўйинда фақат ғалаба учун тўп суриш. Про лигада қатнашиб, Суперлига йўлланмасини қўлга киритдик. Бу йил бизга жуда қийин бўлишини биламиз. Шунга қарамасдан барибир ҳаракат қиламиз. Ҳар бир учрашувда уч очко учун курашамиз. Лекин бир нарсани ҳисобга олиш керакки, футболчиларимиз про лигада ўйнашган, савия билиниб қоляпти. Ёшларимиз ўйиндан-ўйинга шаклланиб, олдимизга қўйилган вазифани бажаришга ҳаракат қиламиз.

- Клуб Суперлигага қайтгандан кейин таркибга бир қанча ўйинчилар таклиф қилинди. Булар қанчалик ўзини оқлаяпти?

- Имкон даражасида вазиятимиздан келиб чиқиб футболчиларни таклиф қилдик. Хоҳлаймизми-йўқми, Суперлигада футболчилар маҳорат бўйича ўйинлар натижаларини ҳал қилиб кетишяпти. Ўзимиз олган футболчиларга ишонаман. Барибир даража билиниб қолди. “Насаф” жамоасида бошқа мақсад бор, бизда эса бошқа мақсад. Футболчиларимга ишонаман. Кўпи ёш йигитлар. Ўзларига билдирилган ишончни оқлашса, янада кучлироқ ўйнай оламиз.

- Қайси чизиқлар сизни қониқтирмаяпти? Қайси позицияларни раҳбарият билан келишиб кучайтирмоқчисиз?

- Тўғриси, оқсаётган чизиғимиз ҳужум чизиғи. Мавсум олди йиғинида ҳам яхши ҳужумчи топишга ҳаракат қилдик. Далер Шарипов “Металлург”да яхши ҳаракатланганди. У ҳали ўзининг яхши формасига кира олмаган шекилли. Яна қайтараман, энг оқсаётган чизиғимиз ҳужум.

- “Шўртан”ни Суперлигадаги имкониятларини неча фоизга баҳолайсиз?

- Олдиндан бир нарса дея олмайман. Ўз майдонимизга қайтсак, барибир ғузорлик мухлислар олдида бундан ҳам кучлироқ ўйин кўрсатишга ҳаракат қиламиз. Хоҳлаймизми-йўқми, жамоа ўз уйида ўйнаса футболчилар мухлислари кўз ўнгида ўйнайди. Бу ҳолатда ўйинчилар бошқача ҳаракат қилишади, деб ўйлайман.

- 4 та ўйин ўтди, жамоа 1 очко олди. Ўзига бўлган ишончни орттириш учун клуб бу ҳолатдан чиқиб кетиш керак. Буни қарангки, кейинги ўйин “Навбаҳор” билан ўтади. Кейинги турда дуранг учун ҳимоявий тактика танлаб, натижа учун ўйналадими? Ротациялар қиласизми?

- Бу ўйинни кўриб таҳлил қиламиз, хатолар устида ишлаймиз. “Навбаҳор” ўйинини кўриб, тайёргарлик қиламиз. Ростини айтаман, ҳимоявий тактика ҳамма вақт иш бериши қийин. Ҳужумкор ўйин тарафдориман. Қачонки, олдинги чизиқдаги футболчилар вазиятларни голга айлантира олмаса бу жуда қийин. Энг яхши ҳимоя бу ҳужум. Шунга содиқ қоламиз. Ҳужумкор футбол ўйнаймиз.

- Ҳужумчи бўлгансиз. Ўша пайтларда яққол ҳужумчи ажралиб турарди. Ҳозир ёрқин ҳужумчи йўқ. Буни сабаби нима?

- Ҳужум чизиғидаги индивидуал футболчилар камайиб кетди. Чунки кўп клублар жамоавий ўйинга эътибор қаратишга ўтдилар. Бу аста-секин таъсирини ўтказа бошлади. Яхши ҳужумчилар саноқли бўлиб қолди. Лекин Ўзбекистонда иқтидорли футболчилар жуда кўп. Улар билан ишлашса, вақти келиб яна Холмуродов, Исоқов, Ҳамидуллаев, Мирхолдиршаев каби ҳужумчилар етишиб чиқади, деб ўйлайман. Агар ҳужумчи битта ҳимоячини алдаб ўта олмаса, бу ҳужумчи ҳисобланмайди. Кўряпсиз, неча йилдан бери Ўзбекистон чемпионатида легионер футболчилар тўпурар бўляпти.

- Ҳужумчи ҳақида гап кетди. “Шўртан” билан бирга Суперлигага чиққан ҳужумчи Муҳриддин Зоиров жамоадан кетди. Унинг ўрнини қандай тўлдириш ҳақида бош қотиряпсиз?

- Зоировни олиб қолмоқчи эдик. Бизни таклифимиз маъқул келмади, шекилли. Бошқа клубни танлади. Бу билан тўхтаб қолмаймиз, ҳаракат қиламиз. Биринчи давра тугагунча ўз ҳужумчиларимиз билан иштирок этамиз, бошқа имкониятимиз йўқ.