"Анвонтед Бойс" учун Жаҳон чемпионати нималари билан эсда қолди?

Хабарингиз бор, Италияда медиа футболи бўйича Жаҳон чемпионати бўлиб ўтди. Қувонарлиси, Жерар Пике томонидан ташкил қилинган ушбу турнирда юртимиз номидан "Анвонтед Бойс" ажойиб тарзда иштирок этди. Медиа клубимиз чорак финалда ўз юришини тўхтатган бўлса-да, мазкур мусобақа клуб ва футбол мухлислари учун ўзига ҳос даражада эсда қоларли бўлди.

Таъкидлаш керак, биринчи навбатда ушбу турнирдаги иштирокимиз унутилмас хотира бўлиб қолди. Испания, Италия, Бразилия, Германия, Аргентина ва яна бир қатор давлатлар ичида Ўзбекистон медиа футбол жамоаси борлиги ҳам катта ютуқ саналади. Тепада номлари зикр этилган терма жамоалар сафида фаолиятини якунлаган ва ҳозирда ҳаракат қилиб келаётган юлдузлар ҳам етарлича эди. Масалан, Жоржо Кьеллини, Серхио Агуэро, Хамес Родригес, Златан Ибрагимович, Неймар ва бошқа юлдуз футболчилар билан ёнма-ён турнирда қатнашишнинг ўзи улкан муваффақиятдир. Айнан "Kings League"нинг асосчиси Пике Ислом Абдужабборов бошчилигидаги клубни шахсан ўзи Италияга таклиф қилганлигини ҳам инобатга олиш керак.

Кейинги навбатда медиа футбол жамоамиз номидан ҳаракат қилган клубнинг натижаларини эслаб ўтиш жоиз. Медиа футбол жамоамиз гуруҳ босқичининг дастлабки ўйинида Омар Абдулраҳмон бошчилигидаги Саудия Арабистонини 4:3 ҳисобида мағлуб этди. Афсуски, навбатдаги тўқнашувда АҚШга 6:2 ҳисобида имкониятни бой бериб қўйдик. Бироқ, юртимиз номидан қатнашган футболчиларимиз 3-турда Перуни камбек эвазига мағлуб этишни уддалаб, чорак финалга йўл олишди. 1/4 финал босқичида Ўзбекистон Колумбияга қарши тўқнаш келди. Ўйин давомида вакилларимиз бор кучлари билан ҳаракат қилишганига қарамай, рақибга йирик ҳисобда мағлуб бўлишди (1:6). Мазкур учрашув "Реал Мадрид"нинг собиқ футболчиси ҳисобланган Хамеснинг пенальтисини дарвозабонимиз Тимур қайтарагни билан эсда қоларли бўлди. 

Албатта, турнир давомида футболчиларимизга бўлган эътиборнинг ўсишини ҳам таъкидлашимиз керак. Илк турда саудияликлар устидан қозонилган ғалабадан сўнг кўплаб футбол мухлисларининг жамоамизга бўлган эътибор яна ҳам ошди. Хаттоки, юртимиздаги рейтингги баланд телеканаллардан бири ҳисобланган "ZO'R TV" ҳам трансляция ҳуқуқини қўлга киритиб, оммага тақдим этди. Перу устидан иродали зафар қучилгандан сўнг англиянинг машҳур "Sky Sports" нашри "Камбекистон", дея хабар чиқарди. Сўнгги баҳсдан аввал эса миллий терма жамоамиз сардори ва "Рома" футболчиси ҳисобланган Элдор Шомуродов ижтимоий тармоқлар орқали "ФК Анвонтед"га омад тилаб, видео мурожаат қилди. Бундан ташқари, Колумбияга қарши ўйинни "You Tube" ижтимоий тармоғида 51 мингдан зиёд инсонлар томоша қилди. Турнирни тарк этганимиздан сўнг эса Серхио Агуэро, Пике ва Хамес каби машҳур ўйинчилар ўзбекистонлик мухлисларга салом йўллаб, омад тилаб қолишди. Шу тариқа, илк маротаба "Kings League"да қатнашган "хоҳланмаган болалар" тарих ёзишди.