АПЛ старт олди. Чемпионлик учун фаворитларни таҳлил қиламиз

Кеча АПЛ янги мавсумига старт берилди. Кун доирасида битта ўйин бўлиб ўтиши режалаштирилганди. "Кристал Пэлас" - "Арсенал" баҳси янги 2022/2023 йилги мавсумнинг илк учрашувига айланди. Хўш, клублар ёзги таътил давомида қандай янгиликларга қўл урди? Кимлар кучайишга муваффақ бўлди ва яна кимлар ўз даражасидан паст харидларни амалга оширди? Қуйида биз юқори тўрт ўрин учун курашадиган жамоалар ҳақида батафсил тўхталиб ўтишга қарор қилдик. (Қуйидаги фикрларнинг ҳаммаси шахсий қарашлар асосида ёзилган).

"Тоттенхэм". 

Таркиб нархи: 749 миллион евро.

Энг қиммат футболчиси: Харри Кейн (90 миллион евро).

Келганлар: Ришарлисон ("Эвертон"), Ив Биссума ("Брайтон"), Клеман Лангле ("Барселона") ва Иван Перишич (эркин агент).

Кетганлар: Стивен Бергвейн ("Аякс"), Жо Родон ("Ренн") ва Жек Кларк ("Сандерленд").

Бу мавсумдаги тахминий ўрни: 4.

Антонио Конте янги мавсумга қизғин тайёргарлик олиб борди. Яхши ва керакли харидларни амалга оширди, етакчиларини сақлаб қолишга муваффақ бўлди. Италиялик мутахассисдаги тажрибага ишонадиган бўлсак, "шпорлар" бу мавсум 3 ликка кириш учун жиддий рақобат туғдиради. Айниқса, Сон ва Кейн жуфтлигига Ришарлисон каби истеъдодли ҳужумчи қандай қўшилиб кета олиши ҳаммани бирдек қизиқтирмоқда. 

Шунингдек, лондонликлар бу мавсум қайси тактикага мурожаат этиши ҳам кўпчиликни ўйга толдирган бўлиши табиий. У амалга оширган трансферларга яхшилаб назар солсак, жамоанинг 3 та марказий ҳимоячи билан ўйнашига шубҳа қолмайди. Бироқ асосий савол - ҳужумда неча ўйинчи ҳаракат қилади? Яна ўша Сон-Кейн дуэти асосига қурилган 3-5-2 тактикаси танланадими ёки қанотларга кўпроқ урғу бериладиган 3-4-3 схемасими? 

Ҳа, айтганча, Конте ҳар сафар ўзи бошқарган жамоалари билан биринчи ёки иккинчи мавсумида албатта, қандайдир совринни қўлга киритган. Балки бу сафар ҳам...

"Челси". 

Таркиб нархи: 840 миллион евро.

Энг қиммат футболчиси: Мейсон Маунт (75 миллион евро).

Келганлар: Раҳим Стерлинг ("Манчестер Сити"), Марк Кукурелья ("Брайтон") ва Калиду Кулибали ("Наполи").

Кетганлар: Ромелу Лукаку ("Интер"), Антонио Рюдигер ("Реал"), Андреас Кристенсен ("Барселона") ва Жейк Кларк-Сальтер (КПР).

Бу мавсумдаги тахминий ўрни: 3.

"Челси" ёзда ажойиб трансферларни амалга оширди. Ҳар томонлама ҳавас қилса арзийдиган сиёсат, дейишимиз мумкин эди. Бироқ кўплаб футболчилар Лондонга келмай, бошқа жамоаларга ўтиб кетгани ҳам айни ҳақиқат. Нима бўлган тақдирда ҳам, Стерлинг, Кулибали ва Кукурелья каби футболчилар айни пайтда ҳар қайси топ клуб учун орзу бўлса ажаб эмас. Балки бундай даражадаги юлдузлар "аристократлар"ни чемпионлик учун курашишига ҳам етарли бўлар.

Шунга қарамай, жамоани тарк этганлар ҳам "номи катта" футболчилар саналади. Лукаку, Рюдигер ва Кристенсен ўтган мавсумдаги "Челси"нинг асосий таркиб ўйинчилари ҳисобланарди. Гарчи Лукаку кейинчалик захирада қолиб кетган бўлса-да, лекин барибир катта беллашувларда Тухель унга ишонишга мажбур эди. 

Кристенсен ўрнини Кулибали тўлдириши ҳақиқатга яқин. Лукакунинг ўрни Хаверц, Вернер ва Стерлинг билан ўзгартирилиб, ёпилиб кетар. Аммо Рюдигерга ким ўринбосар бўла олади? Чалоба, Сарр ва Ампаду АПЛ даражасига тўла мос тушиб кетмаган. Мана шу томонлама Тухель бироз қийналиши мумкин.

Марказий ҳимоядаги муаммолар шак-шубҳасиз қанот ҳимоячилари учун ҳам ноқулайликлар туғдиради. Улар эркин ҳужумга ўтиб кета олмайди, қанотда ёйилиб эмас, асосан, марказга эътибор қаратган ҳолда ҳаракатланади. Табиийки, бу жамоанинг ўйинига салбий таъсир кўрсатмасдан қолмайди.  

"Манчестер Сити".

Таркиб нархи: 1,01 миллиард евро.

Энг қиммат футболчиси: Эрлинг Холанд (150 миллион евро).

Келганлар: Эрлинг Холанд ("Боруссия" Д), Калвин Филлипс ("Лидс") ва Штефан Ортега (эркин агент).

Кетганлар: Фернандиньо ("Атлетико" Паранаэнсе), Раҳим Стерлинг ("Челси"), Габриэль Жезус ("Арсенал"), Александр Зинченко ("Арсенал") ва Педро Порро ("Спортинг").

Бу мавсумдаги тахминий ўрни: 2.

Ўтган мавсум чемпионлари жорий йил учун ҳам асосий фаворитлардан бўлиб турибди. Жамоа бир қатор йирик харидларни амалга оширди. Холанд, Альварес каби истеъдодли ҳужумчилар таркибга қўшиб олинди. Шунингдек, Стерлинг, Зинченко, Жезус, Фернандиньо ва бошқа кетишни истаган футболчилар клубни тарк этди. "Шаҳарликлар" тўлиқ бўлмаса-да, қисман янгиланишларга қўл урди. Бу нафақат таркиб борасида, балки мақсадлар борасида ҳам. Кўринишидан "Сити" учун АПЛ аввалгидек муҳим эмас. Шайхлар диққат-эътиборини ЕЧЛга қаратгандек таассурот уйғотмоқда. Сабаби, Стерлинг, Зинченко, Жезус каби ўйинчилар захира учун ажойиб вариант эди. Ҳозир захира ўриндиғи анча бўшаб қолган. Асосий ўн битталик доимгидек ўта кучли. Ҳар қандай рақиб учун ҳавас қилса арзийдиган даражада. Бироқ биз билган "Сити" иккита тенг кучга эга таркиби билан эсланарди.

Иккинчидан, Холанд ва Филлипс сингари катта ўйинларда тобланган истеъдод соҳибларининг олиб келиниши чемпионат учун эмас, кўпроқ Европа чемпионлар лигаси учун мўлжалланган бўлиши эҳтимолдан йироқ эмас. Холанд "Боруссия" билан айнан мана шу турнирда ўта хавфли ўйинчига айланарди. Калвин Англия терма жамоасида плей-офф баҳсларида қандай ўйнаш кераклигидан яхшигина хабардор.

"Ливерпуль".

Таркиб нархи: 870 миллион евро.

Энг қиммат футболчиси: Муҳаммад Салоҳ (90 миллион евро).

Келганлар: Дарвин Нуньез ("Бенфика"), Фабио Карвалью ("Фулхэм") ва Калвин Рэмзи ("Абердин").

Кетганлар: Садио Мане ("Бавария"), Нико Уильямс ("Ноттингем Форест"), Такуми Минамино ("Монако"), Марко Груйич ("Порту") ва Дивок Ориги ("Милан")

Бу мавсумдаги тахминий ўрни: 1.

Кубоклар бўйича мутахассисга айланиб бораётган Клопп шогирдлари бу мавсум АПЛни қўлга киритишга жиддий киришиши кутилмоқда. Аслида, жамоа ўтган мавсумда ҳам бу натижага жуда яқин келганди. Бироқ айрим сабабларга кўра, чемпионлар лигаси ҳам, премьер-лига ҳам қўлдан бой берилди. Клуб ўз олдига улкан мақсадларни қўйган -"квадрупл"га эришиш. Умуман олганда, "қизиллар" бу учун ҳамма нарсага эга. Юлдузли таркиб, ишончли захира, тажрибали мураббий ва албатта, бутун дунёга машҳур содиқ мухлислари бор бу жамоанинг. 

Нуньез, Карвалью каби ёш иқтидорларнинг олиб келиниши нафақат бугун, балки келажак учун ҳам анча фойда келтириши аниқ. Ҳатто "Ливерпуль"нинг ҳозирги таркибига қараб туриб, Маненинг "Бавария"га ўтиб кетгани сезилмаяпти ҳам. Салоҳ - Нуньез - Диаз триоси бу мавсум катта саҳнага чиқиши кутилмоқда. Кўрамиз, мерсисайдликлар ўзи иштирок этадиган мусобақаларда қандай натижалар кўрсата оларкин?!

Шоҳрух Зоиров мақоласи.