Арбелоа Моуриньо “Реал”га келиши ҳақидаги миш-мишларга муносабат билдирди

"Реал Мадрид" бош мураббийи Алваро Арбелоа келаси ёзда Жозе Моуриньо тайинланиши мумкинлиги ҳақидаги маълумотга изоҳ берди.

"Эртанги ўйиндан хавотирдаман. Келажак - бу эртага, мен ҳар доим "Реал" ҳақида ўйлайман. Бундай саволларнинг барчасини тушунаман, лекин келажак эртага эканлигини айтишда давом этаман, мана бу муҳим. Ҳар бир ўйин - бу менинг ҳаётим", - дея Арбелоанинг сўзларини келтиради Sport.es.

Аввалроқ ОАВ Моуриньо "Қироллик клуби"га қайтишни хоҳлаётгани ҳақида хабар берган эди. Шу билан бирга, португалиялик мутахассиснинг ўзи "Реал" у билан боғланмаганини очиқчасига маълум қилди.

Арбелоа январь ойидан бери "қаймоқлилар"ни бошқариб келмоқда. Унинг амалдаги меҳнат шартномаси 2027 йилнинг ёзигача мўлжалланган.