Арбелоа: "Мюнхенда ғалаба қозонишга қодир ягона жамоа — "Реал"

"Реал Мадрид" мураббийи Альваро Арбелоа Чемпионлар лигаси чорак финали жавоб учрашуви олдидан "Бавария"га қарши реваншга ишонаётганини билдирди.

Сешанба куни мадридликлар ўз майдонида мюнхенликларга 1:2 ҳисобида мағлуб бўлди. Шунга қарамай, испаниялик мутахассис жамоасининг имкониятларига юқори баҳо берди.

"Озгина омад биз томонда бўлганида, иккинчи бўлимдаги бундай сценарийдан қочишимиз мумкин эди. Биз тўпни йўқотишда икки марта хатога йўл қўйдик, бу эса мутлақо мумкин эмас эди. Ўйин олдидан айнан шу ҳақда гаплашгандик, чунки бундай рақибларга қарши ҳар бир хато учун жазо муқаррар.

Урган голимиз эса бизга умид бағишлайди. Агар Мюнхенда кимдир ғалаба қозона олса, бу — "Реал", — деди Арбелоа.

Шунингдек, у Мануэль Нойернинг учрашувнинг энг яхши футболчиси деб топилганига ҳам муносабат билдирди.

"Бу энг яхши янгиликми-йўқми, билмайман. Лекин бу уларга муаммо туғдира олишимизни кўрсатади. Бу ўйин бизга кўп нарсани ўргатади. Биз бу баҳсга етарлича тайёргарлик кўра олмадик, улар эса бу ерга анча яхлит жамоа бўлиб келди. Улар узоқ вақтдан бери бирга ўйнаб келмоқда.

Кимки муваффақиятга ишонмаса, Мадридда қолиши мумкин. Менда характерли футболчилар бор ва уларнинг кийиниш хонасида айтган биринчи гапи: "Биз у ерда ғалаба қозонамиз", бўлди", — дея қўшимча қилди мураббий.