Арбелоа шогирдлари “Сити”ни қандай янчиб ташлаганини тушунтирди

“Реал” бош мураббийи Альваро Арбелоа УЕФА Чемпионлар лигаси 1/8 финал босқичи биринчи учрашувида “Манчестер Сити”га қарши ўйин натижаси ҳақида фикр билдирди.

Ушбу ўйинда мадридликлар кутилмаганда 3:0 ҳисобида ғалабага эришди. Агар Винисиус Жуниор пенальтини аниқ бажарганида ҳисоб янада йириклашган бўларди.

- Натижа кутганимиздан ҳам яхшироқ бўлди.“Сантьяго Бернабеу”да футболчиларнинг ўйиндан завқ олгани мени қувонтирди, улар сўнгги қийин синовлардан кейин бундай ғалабага лойиқ эди.

Ташқаридан жамоамиз кучи ҳақида шубҳалар айтилган эди, аммо биз “Реал”миз ва бизни камситиш мумкин эмас.

Биз “Сити”нинг ўйин услуби ва Гвардиоланинг тактикасини яхши биламиз, у нимага интилаётганини тушунамиз. Уларга майдонда бўш ҳудуд қолдирмадик ва асосий узатма йўлларини ёпдик.

Рақиблар сизни олдинга чиқариб, кейин қарши ҳужум қилишга ҳаракат қилади, аммо сабр билан ўйнаб ва уларнинг орқа чизиғига ҳужум қилиб, хавфли вазиятлар ярата олдик.

Мен учун Вальверде — замонавий Хуанито, “Реал” футболчиси қандай ўйнаши кераклигининг намунаси, - деди Арбелоа.

Жамоалар ўртасидаги жавоб ўйини 17 март куни Манчестердаги “Этихад” стадионида бўлиб ўтади.