Аргентина жаҳон чемпионати олдидан бош мураббий бўйича қарор қабул қилди

Аргентина футбол ассоциацияси раҳбарияти 2026 йилги жаҳон чемпионати олдидан миллий терма жамоа бош мураббийи Лионель Скалони фаолияти бўйича якуний қарорга келди.

Унга кўра, раҳбарият бу мутахассисни терма жамоа бошқарувида узоқроқ сақлаб қолмоқчи. Ана шу мақсадда Скалонига янги шартнома берилади.

Topskills Sports UK нашри маълумот беришича, Аргентина футбол ассоциацияси аллақачон Скалони билан шартномани узайтириш бўйича музокараларни бошлаб юборган.

Ассоциация президенти Клаудио Тапиа 2026 йилги жаҳон чемпионати бошланишидан олдин келишув эришилганини расман эълон қилишни истамоқда.

Эслатиб ўтамиз, жаҳон чемпионати 2026 йилнинг 11 июнидан 19 июлигача Шимолий Американинг учта давлати — АҚШ, Канада ва Мексикада бўлиб ўтади.

Лионель Месси етакчилигидаги Аргентина терма жамоаси бўлажак мундиалда жаҳон чемпионлиги унвонини муносиб ҳимоя қилиши керак.