Арнольд "Реал Мадрид" футболчиси сифатида илк катта интервьюсини берди (тўлиқ матбуот анжумани)

Хабарингиз бор, бир неча дақиқа олдин "Реал Мадрид"нинг янги футболчиси Трент Александр-Арнольд ўзининг матбуот анжуманида иштирок этиб, кўплаб қизиқарли саволларга жавоб берди. 
 
"Реал Мадрид" билан шартнома имзолаш ҳар куни содир бўладиган ҳодиса эмас. Бу рўёбга чиққан орзу. 
 
Бу ерда бўлганимдан жуда хурсандман. Клубни қўллаб-қувватлайсизми ёки йўқми, унинг тарихини ҳурмат қилишингиз керак. 
 
Мен "Реал"нинг 3 та ЕЧЛ ғалабасини томоша қилиб вояга етганман. Жамоанинг совринлар ютишига бегона эмасман. 
 
Хаби билан бир неча марта гаплашганман. Унга ўсиб келаётганимда менинг кумирим бўлганини айтдим, шунинг учун у билан ишлаш орзуйимнинг ушалиши. Хабидан ўрганиш учун унинг атрофида губкадай бўламан. 
 
Карвахаль? У ажойиб футболчи. Унга ва эришган ютуқларига катта ҳурматим бор. Бундай ютуқларга истеъдодсиз эришиб бўлмайди. 
 
Беллингем? Биз гаплашдик, лекин одамлар ўйлаганчалик эмас эди (кулади). Биз "Ливерпуль" ҳақида, "Реал" ҳақида гаплашдик, футболчилар ўртасидаги оддий суҳбатлар эди. "Реал Мадрид"да ўйнаган инглиз футболчилари саноқли, шунинг учун бу жамоанинг бир қисми бўлиш алоҳида аҳамиятга эга. 
 
Бу жамоадаги ўйинчилар билан "Олтин тўп"ни қўлга киритиш жуда қийин бўлади (кулади). Мен шунчаки уларга қарши эмас, балки улар билан ўйнашдан хурсандман. 
 
Мен бу ерда бўлганимдан бошим осмонда. Ўзимни жуда омадли ва фахрли ҳис қилаяпман. 
 
Агар "Ливерпуль"ни тарк этишим керак бўлганда, бу фақат "Реал Мадрид" учун бўларди. Мен буни узоқ вақтдан бери билардим. 
 
Формамда фақат Трент ёзилгани ҳақидами? Бунинг сабаби оддий: Европага борганимда, уч исмли ҳолат одамларни жуда чалғитади. Одамлар мени Арнольд, Алекс, Трент деб чақиришади. Шунинг учун буни соддалаштирайлик, деб ўйладим. 
 
Умид қиламанки, бу ерда "Ливерпуль"да эришган ютуқларимни такрорлай оламан ва ҳужумчиларга кўплаб голли узатмаларни амалга ошира оламан. 
 
Президент менинг испан тилимдан мамнун бўлди (кулади). Бу кўпчиликни ҳайратда қолдирди. 
 
Мен Девид Бекҳемнинг бу ерда ўйнаганини эслайман, бу ажойиб эди. Криштиануни ва уни қандай кутиб олишганини кўрдим. У ўша пайтда дунёнинг энг яхши футболчиси эди. Бу менинг онгимда катта таассурот қолдирган эди. 
 
Тўхтаб турган тўпдан зарба бериш вазифасими? Мен майдоннинг ҳар бир дақиқасида муҳим роль ўйнашни хоҳлайман. Тўп билан ҳам, тўпсиз ҳам ўйинга таъсир ўтказишни истайман. Ҳимоя қилиш керак бўлса, шундай қиламан, тўп узатиш керак бўлса, шуни ҳам қиламан. 
 
"Ливерпуль" барча орзуларимни рўёбга чиқаришимга ёрдам берди. Мен унга умрбод қарздорман. Аммо энди вақти келди деб ўйладим. Бу имконият пайдо бўлди ва буни ўйлаб кўриш керак эди, мен шундай қилдим. 
 
Шу билан бирга, мен Дин Хаусен билан ҳам гаплашдим. Уни таътил пайтида кўрган эдим" - дея ўз сўзларини якунлади англиялик ҳимоячи.