“Арсенал” Артетага хушхабар айтди

“Арсенал” раҳбарияти жамоани 22 йиллик танаффусдан кейин чемпионга айлантирган бош мураббийи Микель Артетани яхшиланган шартлар асосидаги янги шартнома билан тақдирлашга қарор қилди.

Ҳозирги вақтда Артетанинг бир йилдан сўнг муддати тугайдиган шартномасини узайтириш бўйича музокаралар тўхтатиб қўйилган. Чунки Микель эътиборини мавсум якунига қаратишга қарор қилганди.

“Арсенал” муддатидан аввал Премьер-Лига чемпионлигини қўлга киритди, аммо 30 май куни “канонирлар”ни ПСЖга қарши Чемионлар Лигаси финали кутмоқда.

Шундан сўнг 44 ёшли испаниялик мутахассис келажаги бўйича музокаралар столига қайтишга тайёр бўлади.

“Арсенал” ушбу мавсум қандай якунланишидан қатъи назар, Артета билан барибир янги шартнома тузмоқчи эди, бироқ энди клуб Микелнинг ютуқларини ҳисобга олишига тўғри келади.

The Guardian нашри хабарига кўра, “Арсенал” Артетани дунёдаги энг кўп маош олувчи мураббийлардан бирига айлантирмоқчи. Айни дамда Артета йилига 10 миллион фунт ишлаб топади, яна 5 миллион фунт эса Чемпионлар Лигасига йўлланма олгани учун бонус сифатида берилади.

Янги шартнома эса Микелга Европа футболида энг катта маош олаётган “Атлетико” бош мураббийи Диего Симеонега яқинлаштириши айтилмоқда. Аргентиналик мутахассис Мадрид клубидан ҳар мавсум учун 26 миллион евро хизмат ҳақи оляпти.