"Арсенал" асосий ҳимоячиси 2027 йилгача ўйнолмайди

«Арсенал» клуби ва Франция терма жамоаси марказий ҳимоячиси Вильям Салиба 2026 йилги жаҳон чемпионати ярим финалида Испанияга қарши ўйинда (0:2) оғир жароҳат олди ва камида 2027 йилгача майдонга қайтолмайди. 

Бу ҳақда L’Equipe нашри хабар берди.

Манба маълумотига кўра, Салиба Испанияга қарши баҳсда бел соҳасидан жиддий жароҳат олган. Дастлабки ташхисга биноан, футболчи тўрт ойдан олти ойгача ўйинлардан четда қолади. 

Шифокорлар унга жарроҳлик амалиёти зарурлигини айтмоқда, шундан сўнг уни узоқ муддатли тикланиш жараёни кутмоқда. 

Таъкидланишича, жаҳон чемпионати бошланишидан олдиноқ Вильям кучли оғриқлардан шикоят қилган, бироқ шунга қарамай майдонга тушишда давом этган.

2025/2026 йилги мавсумда Салиба «Арсенал» сафида 63 та эҳтимолий ўйиндан 50 тасида майдонга тушди ва жамоанинг Англия Премьер-лигасида ғолиб чиқиши ҳамда Чемпионлар лигаси финалига етиб боришида асосий фигуралардан бирига айланди. Жаҳон чемпионатида эса у Франция терма жамоаси таркибида олтита тўлиқ бўлмаган учрашувда майдонга тушди, аммо гол ёки голли пас билан ажралиб тура олмади.