“Арсенал” энг зўр ўйинчига рақибдан ўринбосар олади

Англия Премьер-лигасида пешқадамлик қилаётган “Арсенал” қишки трансферлар ойнаси даврида таркибини кучайтириш режасини амалга оширмоқчи.

Лондон клуби раҳбарияти жамоа етакчиси Мартин Эдигорга муносиб ўринбосар топишни мақсад қилган.

ESPN ва TEAMtalk каби нуфузли манбаларнинг ёзишича, “канонирлар” норвегиялик футболчига ўринбосар сифатида “Манчестер Юнайтед”да етарли даражада ўйин амалиёти берилмаётган Кобби Майнуни танлади.

Гап шундаки, Мартин Эдегор жароҳат туфайли 66 кун майдондан ташқарида қолди. Ҳали юқори спорт формасига чиқиши учун яна вақт керак. Шу боис, лондонликлар январь ойидаёқ Майнуни манчестерликлардан ижарага олишни мўлжаллаяпти.

Жорий мавсумда “Манчестер Юнайтед” ярим ҳимоячиси барча турнирларда 10 та ўйинда иштирок этиб, битта голли узатма муаллифи бўлди. Ўйинчининг клуб билан амалдаги меҳнат шартномаси 2027 йил ёзигача мўлжалланган. Transfermarkt порталида берилган маълумотларга кўра, футболчининг бозор қиймати 45 миллион еврони ташкил қилмоқда.