"Арсенал" рекорд даражадаги трансферни амалга оширмоқчи

“Арсенал” ҳамшаҳари “Вест Хэм” ярим ҳимоячиси Деклан Райс учун 100 миллион фунт стерлингдан кўпроқ пул таклиф қилди.

"Канонирлар" 24 ёшли англиялик футболчи учун бонуслар билан бирга 105 миллион фунт тўлашга тайёр. "Арсенал"нинг сўнгги таклифига 100 миллион фунт стерлинг миқдоридаги асосий тўлов ва яна 5 миллион фунт стерлинг бонуслар киради.

Агар трансфер амалга ошса, энг қиммат британиялик футболчилар орасида рекордга айланади.

Энг қиммат инглиз трансфери ҳозирча Жек Грилишга тегишли бўлиб турибди. У “Астон Вилла”дан “Манчестер Сити”га 100 миллион фунтга кўчиб ўтган.

Деклан Райсга "Манчестер Сити" ҳам даъвогарлик қилмоқда, бироқ "Вест Хэм" “шаҳарликлар”нинг 90 миллион фунтлик таклифини рад этгани маълум.

Райс ўтган мавсумда АПЛда 37 та ўйинда майдонга тушиб, 4 та гол урди ва 2 та голли узатмага муаллифлик қилди.